کابل ټکی کام( چهارشنبه، ۲ زمری، ۱۳۹۸)
نن سهار ۹ بجې شاوخوا د کابل د ده سبز ولسوالۍ د تره خیلو په تنګي کې د بهرنیو ځواکونو په موټریز کاروان سرتیری برید ترسره شو.
د برید مسؤلیت د طالبانو ویاند ذبیح الله مجاهد ومانه او ادعا یې کړې چې په یاد سرتیري برید کې د “سي ای اې” ګڼ شمیر افسرانو ته مرګ ژوبله اوښتې ده.
په افغانستان کې میشتو بهرنیو ځواکونو هم د برید پخلی وکړ خو ویې ویل چې څوک پکې نه دي وژل شوي.
تازه د کرواشیا د دفاع وزارت خبر ورکړی چې د ننی برید له امله د دوی درې سرتیري ټپیان شوي خو د کوم سرتیري د وژل کیدو خبر یې نه دی ورکړی.
طالبان په داسې حال کې په بهرنیو ځواکونو بریدونه کوي چې همهاله له امریکا سره په خبرو بوخت دي.
تیرو دوو اونیو کې دا په بهرنیو ځواکونو درېیم برید چې ترسره کیږي او بهرنیانو ته پکې مرګ ژوبله اوړي.
