کابل ټکى کام (جمعه، ۲۴ لړم ، ١٣٩٨ل)
دکابل پوهنتون استاد فیض محمد ځلاند چې څو ورځې قطر کې طالبانو سره په خبرو اترو بوخت وو، د “سولې دښمن” ترعنوان لاندې په یوه تازه لیکنه کې دطالبانو سیاست، جګړه او ډیپلوماسي په امریکایانو بر لاسه یاده کړې ده.
ځلاند لیکي، طالب استازو موږ ته وویل چې له تېرو ۷ کلنو راهیسې موږ سره امریکا او د ناټو غړي هېوادونه نیغ په نیغه د سولې خبرې کوي، کال په کال به ددوی د استازو مشرتابه بدلیده، هر نوي مشر به د پخوانیو استازو ټولې کړې ژمنې او خبرې لغوه کړي، د شاوخوا ۸۰۰-۹۰۰ مخونو فایلونه به یې ختم کړل او په نوي تکلاره به یې خبرې پیل کړي.
خو کله چې تېر کال خلیلزاد د خبرو مشرۍ ته رامخکې شو د امریکا د خبرو په تسلسل او حساسیتوب کې لږ څه ځواکمني را برسیره شوه، طالبانو ورته د ملا غني برادر په مشرۍ ۱۷ کسیزه تکړه او با صلاحیت پلاوی وټاکه تر څو د سولې خبرې نهایي شي.
ځلاند زیاتوي، طالب استازو ویل له بده مرغه بیا هم د امریکا پلاوي د پریکړو اختیار نه درلود، بلکې د هر پړاو په تکمیلېدو سره به د دوی د خبرو او ژمنو په بڼه کې بدلون راته، خو بیا هم له دې ټولو سرخوږیو سره، امریکا د نهه پړاوه تکمیل شوي پروسې څخه پداسې توګه په شا شو چې دوی د هوکړه لیک په نهایی شوي بڼې لومړنې نښه شوي لاسلیکونه هم کړي دي.
امریکایان د نړۍ د ځبرځواکۍ، د علمي پرمختګونو او دیپلماتیکي ځواکمنتیا نړیوال ځبرځواک بللی کیږي، خو له بده مرغه دوی له طالبانو سره د یوې تکمیل شوي سیاسي پروسې او دیپلوماتیک ماموریت څخه پدې په شا کیږي چې فکر کوي سره له دومره چنو وهلو او هلو، ځلو شوی پریکړه لیک د دوی په ګټه ندی.
ځلاند وایي، له دې ټولو دا ثابتیږي چې طالبانو امریکا په جګړې، سیاست، سوله او دیپلوماسۍ کې ماته کړي ده چې همدا حقیقت او همدا د تاریخ نوی باب دی.
