(کابل ټکی کام، ۱۳۹۸ ليندۍ ۱۱، دوشنبه)
له تيرو شاوخوا درې اوونيو راهيسې په ايران کې د حکومت پرضد مظاهرې روانې دي چې سلګونه ايرانيانو ته پکې مرګ ژوبله اوښتې خو تازه د نهه افغانانو د وژل کيدو او له سلو زياتو د نيول کيدو راپورونه ورکړل شوي دي.
ځينو رسنيو د ايراني سرچينو له قوله خبر ورکړی، چې د ايران په وروستيو لاريونونو کې نهه افغانان وژل شوي او ۱۲۱ تنه نور حکومت نيولي دي.
د سرچينې په وينا، که څه هم افغانانو په يادو مظاهرو کې ګډون نه دی کړی خو بیا هم د حکومتي ځواکونو هدف ګرځیدلي دي.
تر اوسه د ايران حکومت او د افغانستان د بهرنيو چارو وزارت په دې اړه په رسمي توګه څه نه دی ويلي.
ايران کې دغه مظاهرې په څرګنده د تيلو د بيې لوړيدو په غبرګون کې پيل شوې خو ايران حکومت تور لګوي چې امریکا، سعودي او اسرائيل د دغه مظاهره کوونکو تر شاه ملاتړ کوي.
د بښنې نړیوالې ادارې د راپور له مخې، له وخته چې مظاهرې شروع شوي تر اوسه د ايراني ځواکونو په ډزو ۱۶۱ کسان وژل شوي، خو ځينې نورې سرچينې بيا دغه شمير د ۳۰۰ په شاوخوا کې ښيي، چې همدغه راز سلګونه پکې ټپيان او سلګونه نور حکومت نيولي دي.
