کابل ټکی کام (سه شنبه، ۱۸ زمری، ۱۴۰۱ل)
افغان لوبډلې د ایرلنډ پر وړاندې د روانې لوبلړۍ د لومړنۍ شل اوریزې نړیوالې لوبې پچه وګټله، لومړی یې د سیالې لوبډلې پر وړاندې د توپوهنې پرېکړه وکړه.
د دواړو لوبډلو ترمنځ د پنځو شل اوریزو لوبو د لړۍ لومړۍ لوبه د شمالي ایرلنډ په بلفاسټ ښار کې پیل شوه.
رحمان الله ګوربز او عثمان غني د افغانستان له لوري لومړی میدان ته د لوبې لپاره ووتل.
د څوارلسم اوور تر پایه د ۱۱۶ منډو بدل کې د افغانستان ۴ لوبغاړي وسوځېدل او په دې څلورو لوبغاړو کې عثمان غني تر ټولو ډېرې ۵۹ منډې وکړې.
د کرکټ بورډ د معلوماتو له مخې، رحمان الله ګوربز، ابراهیم ځدراڼ، عثمان غني، نجیب الله ځدراڼ، حشمت الله شهیدي، عظمت الله عمرزی، راشد خان، مجیب الرحمان، نوین الحق او فضل حق فاروقي د محمد نبي په لوبډلمشرۍ د نن په لوبه کې د افغانستان له لوري لوبېږي.
دواړه لوبډلې به په دې لړۍ کې ټولټال پنځه لوبې کوي چې د اګست پر نهمه، یوولسمه، دولسمه، پنځلسمه او وروستۍ لوبه به د اګست پر اوولسمه نېټه پیل شي.
