عبدالرقيب رقيب
سيکولر د خپل بدن په اړه له ﷲ ﷻ نه بغاوت کړي، خو مسلمان بيا په خپل مال کې د ﷲ ﷻ نه بغاوت کړي.
سيکولر باور لري چې بدن يې خپل دی نو د کارولو واک يې هم خپل دی, دی وايې هيڅوک حق نه لري چې په شخصي چارو يې کار ولري. دا خبره يې د ﷲ ﷻ له دغه فرمان نه ښکاره بغاوت ده چې فرمايې:
وَلْتَكُن مِّنكُمْ أُمَّةٌ يَدْعُونَ إِلَى ٱلْخَيْرِ وَيَأْمُرُونَ بِٱلْمَعْرُوفِ وَيَنْهَوْنَ عَنِ ٱلْمُنكَرِ ۚ وَأُو۟لَـٰٓئِكَ هُمُ ٱلْمُفْلِحُونَ ﴿١٠٤﴾
ژباړه: په تاسي کښي بايد څه خلك هرو مرو داسي وي چي د نېکۍ لوري ته بلنه وکړي، په ښو امر وکړي او له بدو منع وکړي. كوم خلك چې دا كار وکړي هماغوى به بريالي شي.
په مسلمانه ټولنه کې ميشت سيکولر خو دا هم وايې چې ﷲ ﷻ لوی ذات دی لوی جهان يې پيدا کړی دی، هغه په وړو کيسو پسي څراغ نه ګرزوي.!
حال دا چې ﷲ ﷻ فرمايې چې غټ او واړه ټول په ليکلې بڼه ورسره ثبت دي او په وخت به يې له هرچا سره حساب کوي
لَا يَعْزُبُ عَنْهُ مِثْقَالُ ذَرَّةٍ فِى ٱلسَّمَـٰوَٰتِ وَلَا فِى ٱلْأَرْضِ وَلَآ أَصْغَرُ مِن ذَٰلِكَ وَلَآ أَكْبَرُ إِلَّا فِى كِتَـٰبٍ مُّبِينٍ ﴿٣﴾ سَبَأ-٣٤
ژباړه: د الله څخه د يوه بڅري په اندازه كوم شى نه په اسمانونو کښي پټ دى او نه په ځمکه كي، نه له بڅري څخه غټ او نه له هغه څخه كوچنى، هر څه په يو څرګند دفتر کښي درج دي.
بل خوا ځيني مسلمانان د حال په ژبه وايې چې #مال يې خپل دی نو د استعمال انداز يې هم خپل دی، دوی وايې هرڅومره او هرډول چې يې کاروي حق لري.
مګر دا عمل يې د ﷲ ﷻ له دي فرمان نه ښکاره بغاوت دی چې فرمايې:
يَـٰبَنِىٓ ءَادَمَ خُذُوا۟ زِينَتَكُمْ عِندَ كُلِّ مَسْجِدٍ وَكُلُوا۟ وَٱشْرَبُوا۟ وَلَا تُسْرِفُوٓا۟ ۚ إِنَّهُۥ لَا يُحِبُّ ٱلْمُسْرِفِينَ ﴿٣١﴾ الأعرَاف-٧
ژباړه: اې د ادم اولادې! د هر عبادت په وخت کښي په خپله ښکلا سينګار اوسئ او خورئ، څښئ او له حد څخه تېرى مه كوئ. الله، له حده تيري كوونكي نه خوښوي.
په بل آيت شريف کې فرمايي:
إِنَّ ٱلْمُبَذِّرِينَ كَانُوٓا۟ إِخْوَٰنَ ٱلشَّيَـٰطِينِ ۖ وَكَانَ ٱلشَّيْطَـٰنُ لِرَبِّهِۦ كَفُورًا ﴿٢٧﴾ الإسْرَاء-١٧
ژباړه: بې ځايه لګښت كوونكي د شيطان وروڼه دي او شيطان د خپل رب ناشكره دى.
علامه ابن عابدين -رحمه الله تعالی- د اسراف او تبذير داسي تحقيق کوي:
په مناسب ځای کې له اندازې زيات لګښت اسراف دی چې حرام دی.
او په نامناسب ځای کې لګښت تبذير دی هرڅومره چې وي, حرام دی او کوونکی يې د شيطان ورور دی.
رب تعالی دي موږ له ټولو بغاوتونو وساتي. امين
