سرلیکنه
وای یو کس چې ډیر ډارن او کمزوری و، له یوه بل سړي سره یې شخړه پیدا شوه، بالآخره یې چلینج ورکړ چې په غیږه راځې؟ هغه سړي ورته وویل هو! راځه، کله چې دواړو سره غیږه ورکړه نو ډارن یې راڅملاوه، او دا بل یې په خیټه ورته کیناست، په دې حالت کې پر ځای د دې چې پر خیټه ناست سړی یې غورزې پرزې ورته وکړي، دا ډارن کس ورته وایي ته یو ځل بیا جګ شه او بیا په غیږه راشه چې زه له تاسره څه کوم؟!
اوس طالبانو وکولای شول چې امریکا ماته کړه سرکوزې یې کړي او په نړیواله کچه داسې تاریخي شرم ورواړوي چې کله به یې هم جبران نه کړي، نو پر ځای د دې چې طالبان غورزې پرزې وکړي، ټرمپ لګیا دی د همغه ډارن کس په څیر د درواغو غورزې پرزې کوي. مخکې به یې ویل چې کولای شم د افغانستان جګړه وګټم خو ملیونونه افغانان به ووژل شي.
تیره ورځ یې وویل چې طالبان هم ډیر سر زوري خلک او مونږ هم ډیر سر زوري یو خو باید سرتیري خپلو کورونو ته راستانه کړو!!!
اوس پوښتنې خپل ځان مطرح کوي او هغه دا چې آیا څوک چې ځان ته سر زوری وایي هغه کمزوري وي؟
او آیا هغه څوک چې کور ته تښتي هغه سرزوري وي که ډارن؟
او دا چې د امریکا تیښتې او د تیښتې لپاره ځان ته د مذاکراتو په نوم د اوړو پوزه جوړوي، معلومه خبره ده چې امریکا ماتې وخوړه او ماته خوړونکی هم ډارن وي او هم کمزوری.
او څوک چې دښمن مات کړي؛ هغه سر زوری، زورور، سر لوړی او هم اتل دی، او اتل خو ځکه چې د نړۍ په کچه ستر مستکبر ځواک یې د خپلو مستضعفو ځانونونو په نذرانه کولو سره په ګونډو کړ.
او امریکا ځکه کمزورې ده چې ایمان نه لري، او د الله او د الله والاو پر وړاندې صفر ده، او عملا مو ولیدله چې صفر شوه.
نو ټرمپ باید ځان له طالبانو سره پرتله قدرې هم نکړي، ځکه چې طالبانو عملا ثابته کړه چې هم د الله د زور په برکت سرلوړي شول او هم زورور ثابت شول.
او امریکا هم ټولو ته معلومه شوه چې ځان یې نړیوالو ته سر زورې بریښوله خو معلومه شوه چې د خدای او خدای والاو پر وړاندې خورا کمزورې ده چې نن په سرکوزي ډول د طالبانو له مجاهدې خاورې ووځي.
