راپورتاژ
عطاء مبارز
په خواله رسنيو کې د بريتانيا د شهزاده هري د ظالمانه او وحشيانه څرګندونو په کور د ننه د حکومتي چارواکو ، سياسي احزابو او عام ولس پراخ غبرګونونه او غوسې راپارولې دي. په رسنيو کې د هري خبر وروسته له هغې لاس په لاس کېږي ، چې وړمه ورځ د برېتانيا د شاهي کورنۍ غړي شهزاده هري پر دې اعتراف وکړ،چې په افغانستان کې يې د پوځي دندې پر مهال ۲۵ طالبان وژلي دي.د برېتانوي رسنيو د راپورونو له مخې ده دا خبره د سپير “Spare”په نوم په خپل چاپېدونکي کتاب کې ليکلې ده.۳۸ کلن شهزاده هري په افغانستان کې دوه ځلې پوځي دنده ترسره کړې، يو ځل په ۲۰۰۷ او ۲۰۰۸ کلونو کې د هوايي حملو د کنټرولر او دوهم ځل په ۲۰۱۲ او ۲۰۱۳ کلونو کې د اپاچې هيليکوپټر د پيلوټ په توګه پاتې شوی دی.هري په خپل کتاب کې ليکلي چې د شپږو پوځي ماموريتونو پر مهال پر خپل هيلکوپټر د لګېدلې کمرې د تصويرونو په مرسته پوه شو چې ۲۵ طالبان يې وژلي دي. شهزاده هري يادونه کړې چې په دې کار نه وياړي او نه شرمېږي، بلکې دا کار يې په دې روحيه کړی لکه د شطرنج دانې چې له تختې لرې کوي.
د طالبانو د سياسي دفتر يوه مهم غړي او د کورنيو چارو وزارت سلاکار انس حقاني هم د بريتانوي شهزاده هري د محاکمې غوښتنه کړې ده. انس حقاني په خپله ټويټر پاڼه ليکلي، چې دغه وژل شوي کسان د شطرنج دانې نه وې، انسانان وو او کورنيو يې د ستنېدو هيله لرله. انس حقاني د بشري حقونو پر نړيوالو بنسټونو نيوکه کړې، چې ګواکې د هرې او نورو په داسې کړنو سترګې پټوي او هيله يې ښودلې، چې هري په نړيواله محکمه کې محاکمه شي. په ټولنيزو رسنيو کې يو شمېر افغانانو د شهزاده هري د دغه اعتراف په اړه توند غبرګونونه ښودلي او د ده د محاکمې غوښتنه يې کړې ده.
دغه راز د حزب اسلامي مشر انجنير ګلبدين حکمتيار هم د شاهزاده هري خبر بوږنوونكى بللی او ويلي يې دي نوموړی د بريتانيا له سر تېرو سره يو ځاى افغانستان ته د جنگ لپاره راغلى و؛ پر دې اعتراف كړى چې ۲۵ افغانان يې وژلي!! له دې داسې ښکاري چې د برېتانيا ۱۵ زره سرتېرو به په شلو كلونو كې څومره افغانان وژلي وي؛ د ناټو ۱۶۰ زره سرتېرو به څومره وژلي وي؟!! د هغوی سرتېري د شهزادگانو په شمول راغلي وو چې د افغانانو په وژلو سره خپلې نښې پخې كړي؛ په كوم پټي كې به يې چې بزگر په کار بوخت وليد ؛ نو له لري واټن به يې په نښه كړ؛ او وبه يې وژلو؛ ويډيو به يې ترې جوړه كړه؛ په دې يې هم اكتفاء نه كوله؛ يوه گوته به يې ترې غوڅه كړه او له ځان سره به يې د عملي ثبوت په توگه وساتله. دا ويډيوگانې په غربي رسنيو كې ښودل شوې!! دا دی گورئ چې د دوى شهزاده د افغانانو په وژلو فخر كوي !! په داسې حال كې چې دلته يې جنگ له يوه مظلوم، بې وزلي، فقير ولس سره وو؛ د خپلي آزادۍ لپاره يې؛ په تش لاس؛ د اشغالگرانو خلاف مقاومت كړى. خداى دې پر دوى هغه ورځ راولي چې په لومړي او دوم نړيوالو جگړو كې ورسره مخامخ شول؛ پر لندن هم بمونه ورېدل. همدارنګه د طالبانو د حکومت مرستيال وياند بلال کريمي په يوه اعلاميه کې ويلي، د هري لهخوا دا اعتراف چې ۲۵ وسلهوال طالبان يې په افغانستان کې وژلي ((دا څرګندوي چې دغه ډول جنايتونه يوازې تر شهزاده هري پورې منحصر نهدي.)) د شهزاده هري دغو څرګندونو ته په برېتانيا د ننه کې ګڼو کسانو عکس العمل ښوولی او ډېرو رسنيو ورباندې بحثونه وکړل.
لنډه داچې په افغانستان کې د هري د ظالمانه تېريو په شان ډېرو افغانانو قربانۍ ورکړې او د دوی کورنۍ يې د غم په ټغر کېنولي دي، د شل کلن اشغال په موده کې د ناټو په مشرۍ د ښکېلو هيوادونو قواوو زموږ بې ګناه کورنۍ ، مدرسې ، ښوونځي، جوماتونه بمبارد کړي او زموږ په بې دفاع ولس يې ړندې ګولۍ توغولې ، چې په ډېرې خواشينۍ سره زموږ هيوادوالو ته ګڼې مرګژوبلې اوښتې او د ماشومانو او ښځو په شمول يې ګڼ شمېر کسان ټپيان او شهيدان کړي، دغسې جنايتونه په اسلامي او کفري نړۍ کې نه توجيه کېږي، نو په کار داده چې نړيواله محکمه ( هاګ ) زموږ د بې ګناه افغانانو د هر څاڅکي وينې پوښتنه وکړي او د اشغالګرو د وخت د لوړ رتبه چارواکو او مسئولينو يې جدي پوښتنه وکړي او د هري په شان د وحشيانه ظلمونو له امله دوی محاکمه کړي.
