کابل ټکی کام (چهارشنبه، ۲۳ وری، ۱۴۰۲ل)
د راپورونو له مخې ، د هندوستان د پنجاب صوبې په یوه پوځي مرکز کې د وسله وال بريد په ترڅ کې ۴ پوځيان وژل شوي دي.
د هند پوځ ويلي، چې دا بريد نن چهارشنبه سهار مهال د بټیندا ښار په يوې پوځي اډې کې شوی چې تر بريد وروسته بريد کوونکي تښتېدلي دي چې ويل کېږي شمېر یې معلوم نه دی.
ياد پوځي مرکز له نوي ډيلي ۲۸۰ کيلومتره او د پاکستان پولې سره سل کيلومتره نږدې واقع دی چې زياتره پکې د پوځيانو کورنۍ ژوند کوي.
د پنجاب صوبې د پولیسو یوه چارواکي ایس پي ایس سریندر پال سینګ پرمار رسنيو ته ویلي چې دا پېښه “د ترهګرۍ حمله نه وه” او په یوې لويې هټۍ کې دننه شوې ده.
تر اوسه ددغه پيښې مسووليت چا نه دی منلی او پوليس وايي، د بريد د لامل معلومولو لپاره يې پلټنې پيل کړي دي.
