ليکنه : سلیمان احمدی
په حقيقت کې د غرب د نوې نظريې مفکرين پاتې راغلل . د هغوی نوې نظريه علمانيت يا بې ديني وه چې له تېرو درې پېړيو راهيسې يې په خپرولو او جاري کولو کې ښې ډېرې خوارۍ وکړې . هغوی ځکه د بې دينۍ خوا ته فنا يووړه چې ټولنه يې په عيسويت ګروهمنه وه خو د عيسويت تاريخ تېر ؤ او نور نه د چلېدو ؤ او نه يې د بشري ژوندانه ستونزې حل کولای شواې . همدا وجه وه چې دغه نوي افکار په ټول غرب کې ډېر زر خپاره شول او تر سياست او واکمنۍ پورې ورسېدل چې د جمهوريت ، سیکولريزم او ديموکراسي په نومونو هرې خوا ته وغځېدل. څرنګه چې دغه مفکوره کې د انسان پر معنويت يو مخ کرښه راښکل شوې او د ټولنې ټوله توجه يې د ماديت لور ته واړوله نو ځکه يې په تخنيک او اقتصاد کې د پام وړ پرمختګ وکړ او د ژوند لپاره يې زښته ډېر وسايل چمتو کړل . خو دا چې د انسان يو ډېر مهم ضرورت يعنې معنويت او روحانيت يې له پامه غورځولی ؤ نو ځکه يې ونه شو کولای د وسايلو دپرېمانۍ سره سره انسان ته خوښي او سکون ورکړی شي . بلکې دغې نوې تګلارې بلا نور مشکلات ور جوړ کړل . هم يې سياست او جمهوريت ناکام شول او ګډوډي يې منځ ته راوړه ، هم يې اقتصادي نظام خراب کړ ځکه د سودي کاروبار په نتيجه کې ټوله پانګه څو محدودو لاسو ته ورغله او هم يې د ښځو او نارينه ؤ د مساوات له امله ټولنه غير فطري شوه ، کورنی نظام ختم ، د اولاد روزنه تباه او د ښځو خپل اصلي حيثيت يې له منځ يووړ . لنډه دا چې دا مهال د لويديځ ټول بازار د وسايلو له پلوه ښه په ځل بل کې دی خو د انساني فطرت له مزاياؤ بالکل بې برخې دي . هلته ټوله پرېشاني او خواشيني ده ، مينه او خواخوږي نشته مورولي او پلارولي نشته ، ورورګلوي نشته او د مېړه او مېرمن په ژوندانه کې د ذره مينې درک نه لګيږي . په دې معنا چې غربي نړۍ د وسايلو له پلوه هيڅ نيمګړتيا نه لري خو همدغه پور او مأمور انسان د خپل معنويت او روحانيت په ورکه پسې شپه ورځ لالهانده ګرځي . د لويديځ د غه تږې پرګنه کې چې هر بختور د اسلام له خواږه شربت غوړپ کړی يو دم يې زړه ته ډاډ او سکون ورننوزي او نن سبا په اروپا او امريکا کې د اسلام د دچټک خپرېدا اصلي راز همدلته دی . دا مهال غربي واکمن چې هلته يې دولت او ميډيا دواړه برمته کړي د خپلو ولسونو همدغه ميلان سخت وارخطا کړي ځکه له يوې خوا د اسلام فطري تعليمات د خلکو پر زړونو ډېر خواږه ورپرېوځي او له بلې خوا د لويديځ په ساينس او علمي ثبوت روږدي خلک چې هر څومره ژورې څېړنې کوي نو د اسلام هيڅ خبره کې له واقعيت او ثبوته مخالف کوم شی نه مومي . يعنې اسلامي لارښوونې هم ساينس دي هم سکون . په دې اساس د اسلام داعيه ډېره مستنده او واقعي ده . په دنيا کې هيڅ داسې مذهب او مفکوره نشته چې اسلام سره خبرو او مناظرې ته کيني . ځکه خو د اسلامي داعيانو له دغې تېرې تورې د هر فکر او هرې فلسفې پلويان سخت په ويره کې دي . مطلب دا چې د لويديځ په وسايلو مالامال مخکښان هيڅ کله نه شي کولای د اسلام کومه لارښوونه وننګوي او څه معقوله او منطقي نيوکه پرې وکړي او په دې ډول د لويديځ ولسونه د اسلام له منلو ايسار کړي نو ځکه يې بدماشۍ ته لاس واچاوو او پر مسلمانانو يې يرغلونه پيل کړل . دا وخت د لويديځ واکمنو سره د اسلام د مقابلې لپاره پرته له جګړو ، بمباريو او پوچ پروپاګنده بل هيڅ شی نشته بلکې اوس مهال پر ټوله اسلامي نړۍ د هغوی ناتار يرغلونه يوازې او يوازې په همدې موخه دي چې د خپلې ناکامې فلسفې او غير فطري تګلارې له منفي پايلو د خلکو پام واړوي او په دې ډول خپلو سيمو کې د اسلام د خپرېدو مخه ډب کړي . خو اسلام به د الله تعالی د رښتيني دين او ژوندني کامل نظام په توګه په غير ارادي ډول د هر عادل کس او سليم عقل خاوند زړه ته ننوځي . او دا شان به آخر هم د عقل او واقعيت په ډګر کې ټولې نړۍ ته د اسلام حقانيت په ډاګه څرګنديږي او پر ټولو خلکو به د الله تعالی حجت قائميږي .
