« سرلیکنه »
دهېواد د شخړې د حل په اړه چې په ۲۰۱۵ زکال کې کومې هڅې له خنډ سره مخ شوې، امريکا او پاکستان د چين په همکارۍ بيا وپيتله چې ددولت او طالب وسله والو ترمنځ د مذاکراتو د پېل لپاره زمينه برابره کړي ، چې د اځل که څه هم د ملي يوالي د حکومت دوه مشران؛ ډاکټر اشرف غني او ډاکټر عبدالله د تېرو مذاکراتو له پايلو ډاډمن نه وو؛ نو پېل کيدونکو مذاکراتو باندې يې د سولې او امن په راتلو باور نه درلود؛ خو د امريکا او پاکستان په بيا بيا ټينګار ولسمشر اشرف غني د اسلام آباد په اسيازړه کنفرانس کې برخه واخيسته.
د اسلام آباد له کنفرانسه د افغانستان د شخړې دحل لپاره بيا هلې ځلې پېل شوې، چې د روانې مياشتې په ۲۳ مه نيټه په کابل کې د څلور اړخيزې کميټې څلورمه غونډه ليدونکې ده، ددې ترڅنګ که څه هم پخواني ولسمشر حامدکرزي ويلي وو، چې دامريکا،چين،افغانستان اوپاکستان سره دې هنداوايران ته هم دمسئلې دحل په اړه په غونډوکې برخه ورکړل شي ؛ خو تر اوسه پورې څلور اړخيزې کميټې ددولت او طالبانو ترمنځ د نقشې له مخې د مذاکراتو نيټه نه ده ټاکلې .
روسيې چې دڅلوراړخيزې کميټې نا اميده هڅې وليدې د افغانستان د مسئلې د حل په اړه يې ددرې اړخيزې غونډې د جوړ ولو اعلان وکړ.
د افغانستان لپاره دروسيې ځانګړي استازي ضميرکابلوف ويلي چې په نږدې کې به دافغانستان په اړه دروسيې په کوربتوب او مشرتابه يوه درې اړخيزه غونډه جوړه شي .
کابلوف وويل: په دې غونډه کې به دروسيې، هند او چين د بهرنيو چارو وزيران برخه واخلي او د افغانستان دنه حل کيدونکې شخړې لپاره به د حل لاره روښانه کړي . ضميرکابلوف رسنيو سره په خبروکې د افغانستان په اړه د امريکا، چين، افغانستان او پاکستان څلور اړخيزې غونډې بې ګټې بللي او د مخه يې په دې غونډوکې ګډون نه کاوه، چې ددې غونډو ګټه افغانستان او د سيمې هېوادونو ته نه؛ بلکې ټوله ګټه يې امريکا ته رسيږي .
ضميرکابلوف ويلي دي ، چې روسيې د مخه هم دافغانستان د مسئلې د حل ويناکړې وه او اوس هم هڅې کوي چې دروسيې او سيمې هېوادونو د ګټو په خاطر چې د افغانستان د نا امنيو اور ګاونډيو هيوادونو ته هم رسيدلی دی درې اړخيزه غونډه جوړه کړي .
د روسيې لخوا په درې اړخيزه غونډه کې يوه مهم ټکي ته اشاره شوې چې په څلور اړخيزه کميټه کې يې ښکاره يادونه ، نه ده شوې، چې هغه د طالب مشرانو پر خلاف بنديزونه پورته کول دي ، چې بايد د افغانستان دمسئلې دحل لپاره لومړی د مذاکراتو کاميابيو په هڅوسره د طالب مشرانو بنديزونه پورته کړل شي ؛ خو د سياسي چارو کارپوهان بياوايي: که روسيه د څلور اړخيزې کميټې په مقابل کې چې مشري يي امريکاکوي درې اړخيزه غونډه پېل کړي امريکا به يې په خلاف قدم واخلي ؛ ځکه چې بيا د امر يکې شخصي ګټې له لاسه ورکول کېږي، چې په پايله کې به د اختلافاتوزياتوالی په افغانستان کې دامريکايي پوځونو په دايمي شتون او جګړو بدل شي.
