کابل ټکی کام (دوشنبه، ۱۵ غویی، ۱۴۰۴ل)
د اسلامي امارت د صنعت او سوداګرۍ وزارت معین مولوي احمدالله زاهد، د چین د موټر جوړولو له مشهور شرکت “دونګ فېنګ اېدي موټورز” له استازي سره لیدنه کړې ده.
د صنعت او سوداګرۍ وزارت په خبرپاڼه کې ويلي، چې په دې لیدنه کې د یاد شرکت استازي د افغانستان په موټر جوړونې سکتور کې د ۵۰ میلیونه ډالرو پانګونې هوډ څرګند کړ. د هغه په وینا، شرکت پلان لري چې دا پانګونه به په څلورو پړاوونو کې تر درې نيمو کلونو پورې عملي کړي، او د دې له لارې به د کال دوه زره موټرونو د تولید ظرفیت رامنځته شي.
ښاغلي مولوي احمدالله زاهد، د دې پانګونې هرکلی وکړ او وې ویل چې افغانستان د پانګونې لپاره یو خوندي، باوري او مناسب ځای دی. نوموړي ډاډ ورکړ چې له ټولو داخلي او بهرنیو پانګوالو سره به یو شان چلند وشي او بشپړه مرسته به ورسره وشي.
د خبرپاڼې له مخې، د “دونګ فېنګ اېدي موټورز” استازي ويلي چې د دې پروژې له پلي کېدو سره به ۵۰۰ تر ۷۰۰ تنو ته د کار زمینه برابره شي.
دغه شرکت وايي، چې په پلان کې لري ګړندي، باروړونکي، امبولانس او د مسافرو بسونه په افغانستان کې تولید کړي، او آن افغان مشتریانو ته یې په قسطونو ورکړي.
