کابل ټکی کام (جمعه، ۲۳ غبرګولی، ۱۴۰۴ل)
د ایران وسله والو ځواکونو د صهیونیستي رژیم پر ضد پراخ ځوابي بریدونه پیل کړي، چې په ترڅ کې یې د اسراییلو دفاع وزارت، استخباراتي مرکزونه او نور مهم نظامي اهداف په نښه شوي دي.
ایراني چارواکو اعلان کړی چې دغه بریدونه د “وعده صادق ۳” عملیاتو په نامه پیل شوي او موخه یې د هغو جنایتونو غچ اخیستل دي، چې اسراییلي رژیم نن سهار وختي د ایران پر خاوره کې ترسره کړي دي.
د راپورونو له مخې، ایران د بېسارې کچې بالستیک توغندي، ډرون الوتکې او دقیق هدفي سیستمونه کارولي، څو د اسراییلو مهمې پوځي ودانۍ او دفاعي تأسیسات له منځه یوسي.
د اسراییلي رسنیو د راپورونو له مخې، بریدونه خورا دقیق وو او د دفاع وزارت شاوخوا ګڼ ځایونه سخت زیانمن شوي دي. تل أبیب کې حالات خورا ترینګلي دي او خلک خوندي ځایونو ته تښتېدلي دي.
د ایران د دفاع وزارت ویاند ویلي:
«دا یوازې د پیل پیغام دی؛ که اسراییلو له تجاوز لاس وانخست، لا شدید ځوابونه به هم ورکړل شي.»
کارپوهان باور لري چې دا بریدونه به نه یوازې د اسراییلو نظامي غرور ته ټکان ورکړي، بلکې د سیمې امنیتي وضعیت به هم لا پسې ترینګلی کړي.
