نور به نړيوال د امريکايانو کوکې اوري!

« سرليکنه »

تېرو ۱۵ کلونو کې د اروپايي اتحاديې په مشوره او د امريکا په مشرۍ د ناټو غړو هېوادونو هوايي او ځمکنيو پوځونو د افغانستان په ښارونو ، ولسواليو ، بانډو او کورونو کې په بېلا بېلو نومونوعملياتو او هوايي بمباريو کې د افغانانو له کورونو جنازې وايستلې ، د افغانستان په هر کور او کلي کې په تېرو ۱۵ کلونو کې د غم ټغرغوړيدلی پروت و ؛خو دا دغم ټغر به يوازې د افغانانو په کور کې نه وي غوړيدلی ، کله خو به د هغه چا په کور کې هم غوړيېږي چا ، چې د افغانانو په کورکې د غم د ټغر د غوړولو زمينه برابره کړي ده او هغه متل به ضرور په ثبوت رسېږي ، چې اور بلوونکی هم په خپل اورکې سوزېږي .

افغانانو په خپل لرغوني تاريخ کې په چا هم تېری نه دی کړی او نه تېري ته زمېنه برابروي تل يرغلګرو د افغانستان په پاکه خاوره تېری کړی دی.

له پيرنګه واخله تر امريکايي يرغله پورې د افغانانو له غرونو د بارودو لوګي پورته شوي ، چې اروپايي ټولنې او امريکا د افغانانو په کورونو کې په بې رحمۍ سره ژړا او کوکو ته دوام ورکړ او دا لا نه دې څرګنده ، چې ترکومه به دا حالات وي .

په نړيوالو راپورنو کې مې يو خبر تر سترګو شو ، چې د امريکا په سلوانيا د پيستربورګ سيمه کې وسله والو د واده په مراسمو ډزې کړي دي ، چې پکې د واده خوشاليو ته راغلې ۴ ښځې او يو نارينه وژل شوی دی ، درې تنه پکې ژوبل دي.

له دې د مخه په ۲۰۱۰ کې د فبروري په ۲۱ مه د ميشکن ايالت په کالا مازو،کې وسله والو ۶ تنه وژلي او د ۲۰۱۵ کال د نومبر په ۲۳ مه او رينزپارک کې وسله والو د موسيقۍ په يوه ګروپ ډزې کړې وې ، چې ۱۶ تنه يې پکې وژلې وو.

امريکايې چارواکي اوس دا اندېښنه لري ، چې په امريکايي ورځ په ورځ د وسلوالو وژنو امريکايي چارواکي اندېښمن کړي دي ؛ ځکه خو د امريکا زيات شمېر دولتي او غيردولتي ادارې له اوباما غوښتي ، چې په افغانستان کې دې مالي او ځاني جګړه پای ته ورسوي ، د دوی اولادونه ( پوځونه ) دې نور له افغانستان څخه را وباسي ؛ خو دا ، چې د امريکا په مشرۍ د ناټو يرغلګرو پوځي تاړاکګرو افغانۍ ميندې او خويندې د خپلو زامنو ، وروڼو او د کورنيو د غړو په وژلو ژړوي د بورو ميندو کوکې يې ننداره کړې له دې ورسته به نړيوال د اروپايانو او په ځانګړې توګه د امريکايانو له کورونو ژړا او کوکې اوري .

په امريکا کې ټول امريکايان جګړه نه غواړي د ريګن څخه نيولې تراوباما پورې واکمنو يوازې په افغانستان کې نه؛ بلکې په عراق ، سوريه ، فلسطين ، يمن او نورو هېوادونو کې په دې خاطر ، چې خپلو شومو موخو ته ځان ورسوي خپلو وسلو ته د خرڅلاو بازار ګرم کړی، په هر هېواد او په ځانګړې توګه يې په عربي هېوادونو او منځنۍ اسيا کې د جګړې اوربل کړی دی .

که وروسته له دې د امريکايانو له کورونو د وسلوالو په وژلو ژړا او کوکې اوريدل کېږي ، د دې ژړا او کوکو بنسټ همدې امريکا اېښی دی نور دې اروپايي امريکايي چارواکي د امريکايانو له کورونو څخه ژړا او کوکو ته انتظار وباسي؛ ځکه دوی په افغانستان کې دزرګونو بې ګنا افغانانو ميندې په کوکو سره ژړولي دي.