کابل ټکی کام ۲۴وږی/۱۳۹۴
تبصره: مبصر
نن سبا د انټرنېټ په دور کې د خپل نامه برېښناليک سره سم هر پېښه د برېښنا په څېر د نړۍ له يوه سره بل سرته رسېږي او د وخت ويښ ځوانان پرې د برېښنا په څېر هر اړخیزه نظر ښکاره کوي.
د غزني د زندان خبر د برېښنا په څېر خپور شو او بې له ځنډه قضاوتونه پرې وشول، تر دې له مخه د کندهار، ننګرهار او نورو ولایاتو د زندانونو په نړولو او د بنديانو په خلاصولو کې د مجاهدينو له سرښندنو او قربانيو ورکولو په وسيله د زندانيانو برخليک بدل کړی وو.
د زمریو زړو طالبانو لخوا د غزني کې زندان ماتول د دولت لپاره د ملا په تير ګوزار وو، چې د ټولو کلابنديو سره زمري طالبان زندان ته ورسېدل او په خپل شهامت يې د زندان دروازه او دېوالونه ونړول، ځينې پوهان او د نظر خاوندان د مجهزو عسکرو با وجود یوه نادره پېښه بولي.
خپله د کورنيو چارو وزارت له زندانه د ۳۵۵ تنو د خلاصولو تأیید وکړ خو ورسره يې دا هم ومنله چې زندان ته ورغلې ټولې لارې د عسکرو په ورتلو د هغوی د وژنې سبب وګرځېدې، د کورنيو چارو د وزارت مرستيال علي احمد احمدي په ډېره ناتوانه خوله وويل، چې د غزني څخه ۱۸ تنه خطرناک بنديان مرکز ته انتقال شوي دي.
په هر لحاظ که يو شمېر خطرناک بنديان مرکز ته انتقال شوي هم وي، خو پاتې بنديان هم د خلاصون قابل وو ځکه خو طالب وسلوالو د سرونو قرباني ورکړه، د بنديانو ژوند يې وژغوره.
د غزني پېښې د کابل د چارواکو خولې بندې کړي دي.
د غزني د پېښې مسئولین د جرئت خاوندان څرګند شول، د دوی افغاني شهامت ټولې نړۍ ته د لمر په څېر وځلېد او وروسته له دې چې د شهامت او زړورتيا يادونه یې کیږي، له مخه ثابته هم شوې ده، چې د زندانونو په ټولو پېښو کې زمریو زړو طالب مجاهدينو د سرونو په قربانيو بنديان ازاد کړي دي څومره چې په بې رحمۍ او بې عدالتۍ بنديان شوي وو، هومره په ځوانمردۍ او قربانۍ ازاد کړل شول.
د دې او نورو پېښو په اړه بېلابېل نظرونه شته؛ خو زمونږ په اند دا ډول پېښې دوه دلایل لري، موږ د طالبانو په زړورتيا کې هيڅ شک نه لرو، طالبانو قرباني ورکړه، او د خپلو سرونو په بدل يې د زندانيانو راتلونکي ژوند ته د خلاصون لاره خلاصه کړه.
اصلي ټکی د کابل د موجوده ادارې کمزورتيا او له هغې زيات اداري فساد دی، چې په خلاص مټ رشوت نه وي، دا ډول پېښې ډېر کم چانسونه لري چې سر ته ورسیږي.
د غزني په پېښه کې د ولایت نه نيولې تر وزارت پورې د رشوت اخيستنې ثبوتونه شته چې په خپل وخت به رابرسېره شي.
په دا ډول پېښو کې به د زرګونو نه؛ بلکې د لکونو او ميليونونو رشوت اخيستل شوی وي، څو اونۍ به پرې کار شوی وي او پر زندان بريد ته ټولې لارې به سنجول شوې وي، له دې له مخه چې د زندانونو څومره پېښې رامنځته شوي دي د ټولو پېښو هغه شواهد چې رشوت پکې تر کوره رسول شوی، را برسېره شوي دي او د غزني پېښه هم ناڅاپي پېښه نه ده، دا يوه نقطه چې انکار ترې نشي کېدای هغه د کابل په دفاع او کورنيو چارو وزارت کې د طالبانو نفوذ دی، چې په ځانګړو جوړو شويو اړيکو هم د يوې پېښې سره مرسته کېدای شي، يو د طالبانو شهامت بل د نظامي چارواکو سره اړيکې او درېيم عامل يې رشوت دی چې دا ډول پېښو ته يې زمينه برابره کړې ده.
