د روان ميلادي کال د سپتمبر په نهمه، د قطر پلازمېنه دوحه د یوې خطرناکې پېښې شاهده وه. د حماس د اسلامي غورځنګ سیاسي دفتر د صهیونیستي رژيم له لوري په نښه شو. که څه هم د حماس مشران له بريده روغ ووتل خو دغه برید نه یوازې د سیمې د سولې او ثبات پر وړاندې لویه ضربه وه، بلکې د نړيوالو اصولو ښکاره ماتول و.
دغه پېښه په نړیواله او سیمه يیزه کچه په پراخ ډول وغندل شوه. د قطر چارواکو، ګڼو هېوادونو او حتی د ملګرو ملتونو د امنیت شورا غړو پر دې برید خپله ژوره اندېښنه څرګنده کړه. دا څرګندوي چې پر یوه خپلواک هېواد کې د داسې بریدونو ترسره کول د ټولو نړیوالو اصولو پر ضد دي او یوازې د یوې ډلې پر وړاندې اقدام نه ګڼل کېږي، بلکې د دولتونو د حاکمیت او نړيوال امنیت خلاف عمل دی.
دا برید موږ ته څو مهم درسونه را زده کوي:
لومړی: اسلامي نړۍ باید نور په جذباتي غبرګونونو بسنه ونه کړي. وخت راغلی چې د اسلامي هېوادونو مشران په ګډه او همغږې تګلارې سره د فلسطین د قضيې ملاتړ وکړي. یوازې غندنه بسنه نه کوي، بلکې باید عملي هڅې، ګډ دریځونه او مؤثر اقدامات ترسره شي.
دوهم: د فلسطین ولس چې څو لسیزې یې د قربانیو اوږده لړۍ ورکړې، نن ورځ د خپلې پایلې درشل ته رسېدلی دی. دا د اسلامي نړۍ د مشرانو دنده ده چې د دوی د مبارزې او قربانۍ ملاتړ وکړي، تر څو د یو خپلواک او باثباته فلسطین د جوړېدو خوب په حقیقت بدل شي.
درېیم: دغه پېښه ښيي چې صهیونیستي رژيم د سختې نړيوالې انزوا په لور روان دی. د نړیوالو غبرګونونو له مخې څرګنده ده چې یوازې پر نظامي زور تکیه د دایمي حل لاره نه ده، بلکې خپله د اسرائیلو لپاره سیاسي او ستراتیژیک خطرونه رامنځته کوي.
څلورم: د اسلامي نړۍ او نړیوالو دنده ده چې څو اړخیز عملي ګامونه واخلي:
په ملګرو ملتونو او سیمهییزو سازمانونو کې د ګډ او روښانه دریځ اعلانول.
د منځګړیتوب کوونکو هېوادونو، لکه قطر ملاتړ او خوندي کول.
د فلسطیني ولس لپاره منظمې بشري مرستې برابرول.
د نړیوالو قوانینو له لارې پر اشغالګر رژيم قانوني او سیاسي فشار زیاتول.
د فلسطین د مبارزې تاریخي تجربه ښيي چې قربانۍ بې پايلې نه پاتې کېږي. اوس اسلامي نړۍ د یوې تاریخي ازموینې مخې ته ولاړه ده: که متحد، هوښیار او عملي اقدامات وکړي، د فلسطین ولس قربانۍ به پایله ورکړي او د آزادۍ خوب به حقیقت ومومي. که بیا یوازې په غندنو بسنه وکړي، نو د بحران لړۍ به همداسې روانه پاتې شي.
د دوحې برید د اسلامي نړۍ د بیدارۍ زنګ دی، اوس د عمل وخت دی، د فلسطین قضيې ملاتړ یوازې یوه سیاسي موضوع نه ده، بلکې د انسانیت، عدالت او ایماني مسؤولیت غوښتنه ده.
