کابل ټکی کام (يکشنبه، ۲ لیندۍ، ۱۴۰۴ل)
د ایران د بهرنیو چارو وزیر عباس عراقچي وايي، د افغانستان او ایران تر منځ سوداګریزې اړیکې په دې وروستیو کې هغه کچې ته رسېدلې چې د ایران له اروپايي هېوادونو سره د سوداګرۍ له ټولې کچې هم پورته دي.
نوموړي ټینګار کړی چې تهران باید پر افغانستان ځانګړی تمرکز وکړي او د پولو په اوږدو کې پراته ولایتونه کولی شي د دواړو هېوادونو اقتصادي اړیکې لا پیاوړې کړي.
ایراني اقتصادي چارواکي افغانستان د پراخو پانګونو لپاره مناسبه بازار ګڼي او وايي چې افغانستان کې د کانونو، کرنې او انرژۍ په برخو کې د پانګونې پراخ فرصتونه شته او د سیمې هېوادونه په چټکۍ سره په افغانستان کې خپلې اقتصادي اړیکې پراخوي.
