کابل ټکی کام (يکشنبه، ۲ لیندۍ، ۱۴۰۴ل)
د مهاجرینو ستونزو ته د رسېدنې عالي کمېسیون وايي، د شنبې په ورځ د هېواد له بېلابېلو پولو ۲۱۰۲ کورنۍ (۱۱۸۵۵ تنه) افغان مهاجرین په اجباري ډول راستانه شوي او له ثبت، بایومیټریک، لېږد، روغتیايي او مالي برخو څخه یې اړین خدمات تر لاسه کړي. تر ټولو ډېر مهاجر د سپین بولدک له لارې هېواد ته داخل شوي چې شمېر یې ۹۸۶ کورنیو او ۵۵۳۳ کسانو ته رسيږي.
کمېسیون زیاتوي چې د لېږد په برخه کې مجموعاً ۲۲۸۷ کورنۍ (۱۳۲۴۶ تنه) بېلابېلو ولایتونو ته لېږدول شوي او نږدې ۱۷ میلیونه افغانۍ د کرایې او لېږد په ډول ورکړل شوي دي. همداراز ۱۷۶۰ کورنیو ته ټولټال څه د پاسه ۱۷ میلیونه افغانۍ نغدي مرسته ورکړل شوې ده.
د خدماتو په برخه کې زرګونه ډوډۍ، اوبه، روغتیايي اسانتیاوې، او نږدې ۱۰۶۰ وړیا سیمکارتونه هم وېشل شوي دي.
