د لغمان قومي مشران، والي د کاڼو په ويشتلو له لغمانه باسي

« تبصره »

له افغانستان څخه ، چې بهرنيو رسنيو ته او يا په داخل کې د اداري فساد په اړه کوم راپورونه ورکول کېږي ؛ پکې يادونه کېږي چې په اداري فساد وزيران، وليان او نور د لوړو پوستونو اشخاص ککړدي ، چې د ځينو پلټنو له مخې د راپورونو تصديق هم شوی او د خبريالانو ورکړل شوي راپورونه کره او ثابت تمام شوي دي.
د لغمان ولايت قومي مشرانو په کابل کې يوې خبري غونډې ته وويل ، چې په لغمان کې ټاکل شوی والي عبدالجبارنعيمي د خپلو وسله والو او اربکيو په وسيله بې ګناه کسان نيسي او زنداني کوي يې، دوی وويل : هغه څوک چې د والي د فساد په وړاندې دريږي هغه زنداني کوي او يا هغه څوک ، چې د خپلو حقوقو غوښتنه کوي، د وهلو ډبولو سره بېره يې تر زندانه  رسوي.

د لغمان قومي مشرانو او مدني فعالانو په خپلو ويناو کې د لغمان د موجوده والي په اړه وويل، چې د دولتي ځمکو په غصب کې لومړی لاس همدا والي لري، له مرکزي دولت او په ځانګړې توګه اشرف غني څخه غواړو، چې والي دې له دندې ګوښه کړي.

موږ د دې لپاره کابل ته راغلي يو، چې د لغمان ولس دې د دې موجوده والي څخه په ګوښه کيدو وژغوري او که زموږ  غوښتنې ونه منل شوې د لغمان موجوده والي عبدالجبارنعيمي به له لغمانه د کاڼو او ډبرو په ويشتلو  وباسو.

په لغمان کې د والي لخوا د بې ګنا اشخاصو په نيولو او ځورولو او هم د اداري فساد له امله قهريدليو قومي مشرانو سختې اوتندې ويناوې وکړې، ويې ويل: که جمهوري رئيس د لغمان د والي په اړه پريکړه ونه کړي او ګوښه يې نه کړي ؛ موږ يې چاره کولای شو .

د يادونې وړ ده: د لغمان ياوالي چې د مخه يې په نورو ولاياتو کې د ولايت دنده ترسره کړې ده دا ډول تورن شوی دی ؛ خو د لغمان والي بيا رسنيو سره په وينا کې ټول پرې لګول شوي تورونه رد کړي او دا کار يې د مغرضو اشخاصو عمل بللی دی.

 وروستنۍ څيړنې څرګنندوي، چې د لغمان والي تر کومې اندازې پورې په اداري فساد کې ککړ دی او د لغمان د قومي مشرانو ويناوې د والي خلاف څومره پرځای دي؛ خو د ورکړل شوو راپورونو له مخې دهېواد په اداري فساد او نورو جراسيمو کې د لوړو پوستونو اشخاص ککړ ثبات شوي دي.

 دا يواځې د لغمان قومي مشران نه دي ؛ بلکې د ټولو ولاياتو اوسیدونکي په دې بد ناورين اخته دي، چې پرې مسلط کړل شوي چارواکي د ولايت د شتمنيو ساتنې  پرځای پر لوټولو بوخت دي.

 د بدخشان د کانونو په غيرقانوني کيندلو کې لوی لاس د ولايت چارواکي لري، د ننګرهار د هډې فارم په دولتي ځمکې غصب کې لوی لاس د ولايت د لوړو پوستونو اوسيدونکي لري، چې ټول په فساد کې ککړ کسان بايد د کاڼو په ويشتلو له ولايته و ايستل شي.