ولس د جنګي مجرمانو سره سوله نه ؛ محاکمه غواړي!
« سرليکنه »
د ملګرو ملتونو نړيوالې محکمې د سر بيا يو پخوانی جنرال کارا جيچ په دې محاکمه کې ، چې په بوسنيا کې د ده په امر امنيتي پوځونو تر ۸۰۰۰ زرو پورې ولسي وګړي وژلي دي؛ د ملګرو ملتونو محکمې يادونه کړې ده ، چې په بوسنيا کې له ۱۹۹۲ څخه تر ۱۹۹۵ م پورې جګړې روانې وې او نږدې سل زره ملکي او نظامي وګړي پکې وژل شوي ، چې کارا جيچ پر ده لګول شوي تورونه ردوي ، وايې: په جګړه کې يې يوازي نظاميان په نخښه کړي دي او دامنل شوې خبره ده ، چې په جنګ کې مړي کېږي .
د ملګرو ملتونو لخوا ، چې د جنګي مجرم په نامه د ۸ زرو انسانانو په تور کاراجيچ ۴۰ کاله په بند محکومېږي ؛ نو په افغانستان کې به جنګي مجرمين د امنيتي اوعادلانه محکمې په دايريدو سره په څوکاله بند محکوم شي؟
عمري بند به ورته اعلان شي، او که د اعدام حکم به پرې صادر شي؟
امريکا د عراق وژل شوی ولسمشر په دې اعدام کړ ، چې د کردستان د ازادۍ غوښتونکو ۵۰۰۰ تنه يې په حلبچه کې وژلي وو ، چې د صدام پلويانو د حلبچي په وژنو کې د امريکا لاس لرل تائيد کړل ؛ خو بيا هم صدام د کردانو او يوشمېر نورو کسانو په وژنو اعدام کړل شو.
د افغانستان په اړه د ملګرو ملتونو د امنيت شورا او دهاګ محکمه يا خو ويده ده او يايې ځان ويده کړی دی ، چې د افغانستان ټول ولس د جنګي مجرمينو محاکمه غواړي ؛ خو ولسمشر اشرف غني ورته د سولې په نامه په ډکه خوله خاندي.
موږ د يوشمېر د نظرخاوندانو دا خبره منو وايي: که په افغانستان کې د جنګي مجرميو محاکمه پيل شي ؛ نو د حکومت ټول لوړ او ټيټ پو ستونه به خالي شي ، چې د حکومتدارۍ لپاره به په حکومت کې څوک پاتې نشي.
د کمونستي دورې نظاميان ، خاديان ، ګونديان … خو به يوهم پاتې نه شي. همدارنګه د جهاد په نامه د سپېڅلو پاکو او سرښندونکو مجاهدينو په ليکو کې يو شمېر هغه ټوپکمار او داړمار خو د بښنې وړ نه دي ، اوس فکر په دې پکار دی ، چې که ياد کسان محاکمه نشي ؛ نو بيا خوهېڅ وخت په افغانستان کې د قانون عملي کولو سوچ نشي کيدای.
که اشرف غني د هغو کسانو سره ، چې د کابل ښار يې په کنډوالو بدل کړی او تر ۴۰ زرو پورې بې ګناه ښځې ماشومان او عمر خوړليو اشخاصو يې د اقتدار په ليونتوب په بې سره ووژل سوله وکړي آيا دا حکومت به حکومت وي؟
دا به د اساسي قانون عملي کول وي ، که د اساسي قانون څخه به سرغړونه وي؟
دا به د شهيدانو سپکاوی وي اوکه په هېوادکې سوله راوستل؟
د داډول اشخاصو پاتې کيدل به حکومت کې چې لاسونه يې ترڅنګلو پورې د مظلومو افغانانو په وينو سره وي هېڅ وخت ورته د افغانانو حکومت نشي ويل کيدای.
ټول ولس سوله غواړي، د جګړو توان نور نلری؛ خو د سولې له واکمن نه د دښمنانو محاکمه غواړي نه د جنګي جنايتکارانو سره سوله.
سوله د هغه چاسره پکارده ،چې هغه د خپل مقدس دين ، پاکې خاورې او د مظلوم ولس د هېواد او ارمانونو په هدف پرديو يرغلګرو ته سېنې سپرکړي وي!
