لیکنه : ډاکټر آصف
له هغې ورځې نه چې په افغانستان کې د کمونست رژیم او قطبي خرسانو (روسانو) په مقابل کې د اسلامي نهضت مخکښانو د مسلمان ملت په پوره ملاتړ وسلې ته لاس کړ نو د اسلام قسم خوړليو دښمنانو ته یې داسې فولادي او غاښ ماتوونکي ګوزارونه ورکړل چې کله به یې هم هېر نشي او هغه د خوشال بابا په وینا چې:
لا تر اوسه یې ماغزه په قرار نه دی
چا چې ما سره وهلی سر په سنګ دی
خو په دې اغزنه لاره کې دغه فقیر او ناتوانه ملت نږدې یونیم ملیون شهیدان نذرانه کړل، یونیم ملیون نور معیوب شول، یتیمان شول او میندې بورې او میرمنې کونډې شوې.
نو د ۷ جهادي ګوندونو له جملې نه دوه ګوندونه هر یو: حزب اسلامی او جمعیت اسلامی چې تر ټولو غښتلي او مخکښ ګوندونه ګڼل کېدل او سره له دې چې پیاوړي ګوندونه وو خو په خپلو کې د سخت رقابت ښکار هم وو، دې دوه ګوندونو تل په هره قضیه کې کله له مثبت او کله هم له منفي رقابته کار اخیستی دی، آن تر دې چې د جمعیت اسلامي د مشر ښاغلي استاد برهان الدین ربانی او د حزب اسلامي د مشر ښاغلي انجنیر ګلبدین حکمتیار په کورونو کې نارینه ماشومان وزېږېدل نو د خپل رقابت په بنا یې د صلاح الدین په نومونو ونومول، دا ددې لپاره چې دغو داوړو ملت او هم خپلو نړیوالو تمیولوونکو (عربی دوستانو) ته دا ښودله چې ګوندې دوي د اسلام د ستر فاتح صلاح الدین ایوبي نه متاثره دي او غواړي چې اولادونه یې د صلاح الدین ایوبي پر پل باندې پلونه کېږدي او بالآخره فلسطین به د غاصبو یهودو له منګولو همغسې وژغوري لکه صلاح الدین ایوبی چې آزاد کړی و ؛ نو ځکه ایوبي د دوي او د دوي د اولادونو لپاره قدوه او الګو ګرځول غواړي په دې معنی چې د افغانستان له آزادۍ وروسته به آرام نه کېني بلکه له یهودو سره به جګړه پیل کوي او د بیت المقدس او مسجد الاقصی په آزادۍ به لاس پورې کوي.
خو متاسفانه چې د وخت په تېرېدو او بدلېدو سره اوس دغه مفکورې هم بدلې شوې دغه کرکټرونه هم بدل شول او د دغو صلاح الدینانو پلرونه او د هغوی تحریکونه هم بدل شول او د بیت المقدس آزادي خو لا پرېږده چې افغانستان یې هم په لوی لاس د صلاح الدین ایوبي دښمنانو ته په لاس ورکړ او برسېره پر دې پخپله هم د یو څو ډالرو په مقابل کې د هغوی په چوپړ بوخت شول.
د یوه صلاح الدین پلار چې له خپلې اصیلې مفکورې نه انحراف وکړ نو لومړی یې د تاجکستان مجاهدین تېر ایستل او دتاجکستان د اسلامي نهضت ګوند ټول غړي یې امام علي رحمانوف ته د سولې په نوم لاس تړلي په لاس ورکړل چې نن په تاجکستان کې نږدې ۲۰۰۰ مسجدونه د مونځ ګذارو په مخ وتړل شول او له ۱۸ کلنۍ ښکته هلکان مسجدونو ته له تللو منع کړای شول او د تاجکستان د اسلامی نهضت مخکښان او غړي یا ووژل شول او یا د زندان د تورو تمبو شا ته واچول شول.
نو اوس صلاح الدین ربانی خو بیا هیڅ ګرم نه ګڼل کېږی چې د خپل پلار له انحراف نه دوه قدمه ور آخوا تېر هم شي.
د صلاح الدین پلار ښاغلی رباني د وخت تیندکونو دومره وقهرولو او کینه کښ انسان شو چې نصاری خو پرېږده آن چې یهودو ته یې هم د ورورۍ لاسونه وغځول، نو ځکه یې اوس صلاح الدین ربانی هم د صلاح الدین ایوبی له دښمنانو سره په یوه دسترخوان ډوډۍ خوري، او د هغوي د اسلام ضد او افغانیت ضد پلانونو او کړنو ته د تایید سر ښوځوي.
پرون دغه صلاح الدین ربانی د امریکا د خارجه وزیر جان کیري سره په خپلو خبرو کې وویل چې دی به د ډیموکراسۍ مطابق د ښځو او بشري حقوقو ساتنه کوي (څه ډول یې چې یهود او نصارا غواړي).
پاتې شو صلاح الدین حکمتیار، دی خو لا تر اوسه چوپه خوله دی او د یوه نیک انسان ګمان پرې کېږي او خدای دې یې همداسې نېک پاتې کړي، خو خلک اوس په دې شکي شوي دي چی په دې ورستیو کې د ده د پلار یو پلاوی د غني د لاسپوڅي دولت سره په مذاکراتو بوخت دی او ویل شوي دي چې په مذاکراتو کې تر اوسه پورې ایله دومره پرمختګ شوی دی چې د حکمتیار پلاوی له یوه مهم شرط نه تېر شوی دی چې هغه د افغانستان نه د بهرنیو پوځونو وتل وو.
دا په دې معنی چې نوموړی هم نور له خپل اصیل دریځ نه انحراف کړی چې هغه په افغانستان کې د بهرنیو پوځونو په نه وتلو رضائیت ښکاره کول دي.
اوس دې خدای خېر کړي چې د حکمتیار صلاح الدین به خپلې چوپتیا ته دوام ورکړي او کنه؟
او یا دی به هم د رباني صلاح الدین سره د رقابت په وجه له ده نه یو څو قدمه وړاندې شي او بالآخره د صلاح الدین ایوبي روح به په قبر کې وزوروي.
