کابل ټکی کام ۱۰غويي/۱۳۹۵، لیکنه: نظرمحمد مطمئن
د ماشوم شهید، مظلوم شهید اباسین جان معصومه څیره دهغه له شهادت وروسته دومره دردونکي ده چې درد یې د هر افغان او مسلمان زړه دردوي.
د هغه انځورونه مې ولیدل، ومې لوستل چې د نهو خویندو یو ورور دی. او بیا داچې په ظلم يې لومړی د لاس یوه ګوته ورڅخه پرې شوې او بیا ظالم او سخت زړه هغه شهید کړ. الله ج دي د اباسین جان روح په جنتونو کې خوشاله لري او ان شاء الله خوشاله به وي.
الله ج دي د هغه پلار او د کورنۍ غړو او نورو دوستانو ته د زړه صبر ورنصیب کړي، غم یې دروند دی خو الله ج ته اسانه ده چې کورنۍ ته یې د زغم توان ورکړي.
پرون مازیګر مې د هغه انځورونه په خواله رسنیو کې ولیدل، ماښام له ملګرو سره چیرته میلمانه وو، هلته مې د پخوا په ډول ډوډۍ ته زړه نه کیدی، نن سهار مې د پخوا پر خلاف له سهار چای سره ناشته ونه کړه، او یقین ولرئ چې د غرمې ډوډۍ مې هم زړه ته نه کیدله او ومې نه خوړله. په دي فکر کې وم چې د مظلوم شهید اباسین د کورنئ د غړو مظلوم ږغ به چاته وي؟ څوک به دهغو مظلوم ږغ واوري؟ او چیرته به داسي یوه مرجع وي چې سړی فکر وکړي هلته بې یې اواز واوریدل شي؟
پوهیږم، د اباسین مورکۍ، د هغه خویندی به نن په نړۍ کې ځان ګوښی احساسوي، هغو ته پرون او نن د قیامت ورځ وي، هغوی به د مجرمینو د نیولو او پیداکولو تمه لري، خو ایا داسي تمه له نظام څخه کیدای شي؟
قاتلین یې باید پیدا شي، که ماشوم د حکومت تر کنټرول لاندي سيمې څخه تښتول شوی وي نو حکومت دنده او مسؤلیت لري چې د هغه مظلوم شهید قاتلین پیدا کړي او د هغه کورنۍ ته یې په عام محضر کې د سزا له پاره وسپاري.
که اباسین د طالبانو تر لاس لاندي سېمه کې تښتول شوی او شهید شوی وي، طالبان دنده او مسؤلیت لري چې قاتلین يې پیدا او دمظلوم شهید کورنۍ ته یې په عام محضرکې د سزا له پاره وسپاري.
باور ولرئ که په سم ډول، په حقیقي ډول هڅه وشي د اباسین جان قاتلین نیول کیږي او مجازات کیږي، خو ستونزه داده چې له مجرمینو سره وسلوال چارواکي په ځینو مواردو کې او یا هم متضرر ته نږدې کسان لاس لري.
د ځاځیو قوم ځوانان دي له فکر څخه کار واخلي، د اباسین غم یواځي د دوی نه دی، دغه غم دي په ځاځیو پسې نه منحصر کوي، غم زموږ ټولو دی، او موږ ټول مسؤلیت لرو چې د شهید اباسین له کورنۍ سره ودریږو، له هر هغه چا چې مسؤلیت ورته راجع کیږي په کلکه وغواړو چې مجرمین پیداکړي، او که پیداکوي يې نه، نو له سیمې څخه په ایستلو او د هغوی ساتلو کې دي مرسته نه کوي.
په کندهار کې زموږ یو سراچه موټر غلا شو، داچې شخصي ملګري مې ډیر وو، او خپل فکر هم لږ هغې او بلې خواته وځغالو، سهار موټر غلا شو، او ماسپښین پورې مو یو شکمن کس خپل ځای ته د ملګرو په مرسته راورساوی، تیر مازیګر او ماښامه يې نه منله، کله چې د هغه د کور ادرس او دهغه د خپلوانو نومونه موږ ورته واخیستل او کور يې هم په پکتیاکې په کومه لیري پرته ولسوالۍ کې و، ورته مو وویل چې کیدای شي ستاسي کور ته تر غلاشوې موټر مخکې زموږ ملګري هلته ورسیږي او بیا به کلي او کور کې شرمنده یاست، نو ماخستن هغه نفر ومنله چې موټر دوی غلاکړی او دهغه ورور د دوی د کور په لور بیولی دی.
په کندهار کې یو لیک او اخطار د طالبانو تر نامه لاندي راکول شو، لیک کورته راغورځول شوی وو، د مرګ ګواښ او دپیسو غوښتنه شوې وه، هیڅ ډول د اخطار څخه متاثره نه شوم، فکر مې وځغلاوو، چې ولي داکار شوی او چا به کړی وي، ولي به د مرګ ګواښ او د پیسو غوښتنه کیږي، کال ۲۰۰۷ ز. وو، او په همدې وخت کې مې د ملګرو ملتونو د ساختماني پروژو د تطبیق یو پروګرام کې د انجنیر په صفت کار کاوو، پر حکومت خو هسي هم باور نه وي، ځکه ویره وي چې داسي نه د حکومت له نوم څخه په ګټه اخیستلو ځینې کسان له مجرمینو سره لاس یو کړی وي. خپله لاس په کار شوم، الحمد لله، ثم الحمد لله، الله ج ډیر ښه ملګري راکړي، په ګډه مو کار شروع کړ، درېمه ورځ مو هغه څوک نیمه شپه کې، د ژمي په یوه سړه شپه کې، په یوه باد او لرونکي شپه کې ونیوی.
پوهیږئ چې مخکنی یاد شوې غل او اخطار ورکونکي څوک وو، د موټر غل کې هغه چا لاس درلود چې موږ سره يې کار کاوو، او ما ملګرو ته سپارښتنه کړي وه چې د پکتیا اوسیدونکی دی، په کندهار کې مسافر دی باید ښه چلند ورسره وشي، مګر هغه د موټر د غلا لپاره پلان جوړکړی وو.
او هغه څوک چې ماته يې اخطار لیک رالیږلی وو، هغه زموږ داسي ګاونډی وو چې غریب خلک وو، ما يې ورور کوم ملګري ته معرفي کړی وو، په میاشت کې دوه یا درې ځله ورتلی او خپل میاشتنی معاش یې اخیست.
ډیر ځله ستونزه له نږدي محیط څخه وي، هغه د پښتو متل دی وايې سړی له خپلې لمنې اور اخلي. دقت دي وکړي، او کوشش دي وکړي چې قاتلینو پسې وګرځي.
زما پوره باور دی چې د اباسین جان شهید قاتلین به الله ج رسوا کړي، الله ج تر هر چا ښه او عادل قاضي دی، الله ج دي ظالمان قاتلان رسوا او پیداکړي. آمین
الله ج دي زموږ مظلوم قوم نور له دغه ډول ناخوالو څخه وساتي.
