افق مې هم د وينو دارې وهي
شاعر/ عصمت قانع
زما بچيه زما صنم جانانه
لا ناخبر يمه خو مرم جانانه
وطن مې دښت د کربلا شو راته
د خپلو وينو جام څښم جانانه
افق مې هم د وينو دارې وهي
شفق په وينو رنګوم جانانه
ليمه مې وچ دې څاڅکې نه لرمه
درته څو څاڅکي څڅوم جانا نه
زما د بقا شعور طاعون نيولی
ځولۍ طبيب ته غوړوم جانانه
بله چاره بله اسره نه لرم
ځم پښتانه را لټوم جانانه
زما (اباسينه) زما زمزم جانانه
د بېوسۍ په چاړه مرم جانانه
