سپین مخونه او تور مخونه
عزیر اسد خیل
د حزب اسلامی او ملي یوالي حکومت تر منځ سوله خپلې وروستۍ مرحلې ته نږدې شوې ده ، او نن سبا کې به حکمتیار صیب هم د اشرف غني تر څنګ د قدرت د ګدۍ په خوا کې راڅرګند شي. د حکمتیار صیب د سولې له شرطونو نه یو شرط دا و، چې د ده نوم به د امریکا له تور لیست نه لرې کیږي.
د امریکا تور لیست هغه خیالي ببولالې دې، چې د خپلو مخالفینو د ویرولو لپاره یې کاروي او ور څخه اغیزمن کار اخلي، هر څوک چې په رښتونې توګه د امریکا مخالف وي امریکا د هغه نوم دغه لیست ته ورغورځوي، خو که په صداقت سره د امریکا د مخالفت نه توبه وباسي نو بیا د تور لیست نه د خپل نوم ویستلو لپاره د امریکا دروازې ټکولی شي او ورته عارض کیدلی شي. امریکا به د عارض عریضه د نړیوالې ټولنې په تضمین سره له خپل مخالف نه ترلاسه کوي او مخالف به د دې تعهد ورکوي، چې په راتلونکې کې به د امریکا د اسلام ضد پلانونو او پروژو د تطبیق پر وړاندې نه خنډ کیږي.
له دې وروسته بیا امریکا د تور لیست نه د دغه ډول توبه تایب د نوم د ایستلو امکاناتو باندې غور کوي، که بخت یاري وکړه نو نوم به یې له تور لیست نه لري شي او امریکا ته به سپین باز شي، خو د مسلمانۍ سپین مخ به یې د خدای جل جلاله او د هغه د رسول صلی الله علیه وسلم پر وړاندې د محشر په ورځ تک تور وي.
متاسفانه چې د امریکا په دروازو کې توبه ویستونکي د خدای تعالی د هغه تور لیست نه یا غافل دي، یا پرې سترګې پټوي او یا هم ورنه عقیدتا منکران شوي دي، چې د نن نه نږدې څوارلس سوه کاله مخکې یې خپلو بنده ګانو ته د هغې په اړه خبرداری ورکړی، او فرمایلي یی دي چې: ((یوم تبیض وجوه و تسود وجوه. الایه)) ژباړه: په هغه یعنې د قیامت په ورځ به ځینې مخونه سپین شي او ځینې مخونه به تور شي، هغه کسان چې مخونه یې سپین شي د خدای جل جلاله په رحمت کې به وي او تل به پکې وي، او هغه کسان چې مخونه یې تور شي د خدای جل جلاله د رحمت نه به لرې او په اور کې به وي.
د دې یت شریف څخه جوته کیږي، چې څوک د امریکا په تور لیست کې راغی هغه دې په دې پوه شي چې د خدای تعالی پر وړاندې به د محشر په میدان کې سپین مخ دریږي، او که د چا نوم له دغه تور لیست نه وویستل شو، هغه دې پر خپل ایمان وویریږي، چې د قیامت په ورځ به د خدای تعالی او ټولو مخلوقاتو په وړاندې تورمخی راپاڅیږي.
اوس په خپل ګریوان کې سر ښکته کړئ او ښه عمیق فکر وکړئ او خوښه مو خپله چې د امریکا د تور لیست نه خپل نوم ویستل غواړئ او که فخر پرې کوئ.
نور قضاوت پخپله وکړئ.
