ولې چین هر کال د دغه هېواد پر مېشتو مسلمانانو د روژې نیولو بندیز لګوي؟

کابل ټکی کام ۱۸غبرګولي/۱۳۹۵، هلال خاورې
په چین کې د کمونست ګوند له خوا د تېرو کلونو په څېر سږ کال هم د دغه هېواد پر مېشتو مسلمانانو د روژې نیولو بندیز لګول شوی دی.
چین د سینجان په خودمختاره سیمه کې پر مامورینو، زدکوونکو او ماشومانو د روژې نیولو بندیز لګولی دی.
باید ووایو، چې د چین په سینجان سیمه کې ډېری مسلمانان مېشت دي.
د سینجان د کورلا ښار څخه د انټرنېټ له لارې په خپره شوې خبرپاڼه کې راغلي دي، چې د کمونست ګوند پر غړيو، عسکرو او ملکي مامورینو، زدکوونکو او ماشومانو د روژې نیولو پابندي لګول شوې ده، او همدا راز یې ورته په دیني فعالیتونو کې د نه ګډون کولو امر کړی دی.
خبرپاڼې لیکلي دي، چې د روژې میاشتې په اوږدو کې د حکومت له لوري امر شوى، چې د سیمې دوکانونه، هوټلونه او رسټورانټونه به نه تړل کیږي.
د سینجان د تیکقي سیمې یوه چارواکي احمد جان توختي رسنیو ته د کمونست ګوند له خوا پر مسلمانانو لګول شوي بندیزونه تأیید کړي دي، او ویلي یې دي، چې د روژې په میاشت کې د کمونست ګوند پر غړیو، عسکري او ملکي مامورنیو، زدکوونکو او پر ماشومانو د روژې نیولو او همدا راز جومات ته د تلو بندیز لګول شوی دی.
په دغه سیمه کې چې شاوخوا ۱۰ میلیونه اویغور ترکان ژوند کوي، د دوی د نړیوالې کانګرې ویاند دلشا رشید د رسنیو له لارې د چین حکومت پر دغه دریځ نیوکې کړي دي.
نوموړي ویلي دي، چې د بیجینګ حکومت د اویغورانو د عقیدې او دین په وړاندې ستر ګواښ جوړ کړی دی.
نوموړي پر چین حکومت سخته نیوکه وکړه، او ویې ویل، چې د چین چارواکي او د کمونست ګوند سربېره پر دې چې په هېواد کې مېشتو ټولو خلکو ته د دیني ازادیو ورکولو دعوې کوي، مګر پر مسلمانانو باندې یې جدي کنټرول راوستی دی.
ده زیاته کړه، چې د چین حکومت له لورې د نورو دینونو د پلویانو پر عباداتو بندیز لګول به په دغه هېواد کې قومي او دیني ستونزې راولاړې کړي.
د ده له قوله چې د همدغې مسئلې له کبله په دې تېرو کلونو کې د زرګونو کسانو د وژل کېدو لامل وګرځېده.
د یادولو ده، چې د چین حکومت په سینجان کې د ټولو ستونزو او نښتو پړه پر مسلمانانو ور اړوي.