د طالبانو د نوي مشر شیخ هبة الله آخندزاده دریځ د امارت د پخوانیو مشرانو په څېر دی

کابل ټکی کام هاشمي عبدالله
نن سهار د طالبانو د رسمي ادرس له لوري کابل ټکی کام ته د یوه ایمیل له لارې چې پکې د طالبانو د مشر شیخ الحدیث والقرآن مولوي هبة الله آخندازده هغه پيغام چې د اختر د مبارکۍ په مناسبت یې ټول مسلمانان او په خاصه توګه خپل جنګیالي مخاطب کړي دي، رالیږل شوی
د پيغام پیل په یوه اسلامي خطبه سره شوی ده، او ورپسې د قرآن پاک مبارک آیات راوړل شوي دي، د پیغام د متن لمړنۍ برخه د طالبانو د دویم ستر مشر ملا اخترمحمد منصور په (شهادت) باندې څرخي، او هغه یې د اسلام د ویاړلې لارې ویاړلۍ، او نه ستړۍ کېدونکۍ قهرمان بللی دی. په پيغام کې نوموړي وعده او توصیه کړې ده چې ددوی د پخوانيو مشرانو په څېر به قربانیو ورکړې ته همېشه تیار وي، او تر هغې پورې به خپله نظامي مبارزه پرمخ وړي ترڅو په افغانستان کې اسلامي نظام قائم شوی وي.
دا چې دنوموړي دا لمړۍ پيغام دی، د خپل مسؤلیت یادونه یې کړې ده او له ټولو خپلو ملګرو یې غوښتي دي چې د کار په ښه اجراء کې ورسره مرسته وکړي. او ټولو ته یې ډاډ ورکړی چې د خپلو دوو پخوانیو مشرانو په نقش قدم به روان اوسیږي، له چا سره به هم تبعیضي چلند نه کیږي او په هغه چا به اعتماد کیږي چې ددوی پخوانیو مشرانو پرې درلود.
نوموړي په خپل پیغام کې ژمنه کړې ده چې د شرعي محاکمو سمونه، د ښځو د شرعي حقوقو په پوره ورکړه، د یتیمانو او بې وزلو لاس نیوی، د تعلیم او تربیې برخه به یې له لمړنیو کارونو څخه وي چې کار به ورته کوي.
دی زیاتوي چې په افغانستان کې د یرغلګرو په خلاف جهاد خپله دیني وجیبه بولي او ترهغه به خپل جهاد ته ادامه ورکوي ترڅو چې اشغال موجود وي. خو نوموړي خپل سیاسي دفتر ته په اشارې سره ویلي دي چې د نظامي مبارزې ترڅنګ سیاسي مبارزه هم پرمخ وړي.
نوموړي بهرني اشغالګرو قوتونو ته سخت پیغام ورکړی دی او د هغوی د مودې زیاتول او نظامي برخه کې واک زیاتول یې د خندا او شرم وړ بللي دي. او ویلي یې دي چې پدې سره نشي کولای ددوی حوصله ټکنۍ کړي دوی به ترهغو خپلې مبارزې ته دوام ورکوي ترڅو یې په هېواد کې (پوره اسلامي شرعي نظام نه وي قائم کړی)
نوموړي په خپلو افغان مخالفینو باندې غږ کړی دی چې له دوی سره یوځای شي اود تاریخ د بدنامو څېرو په نوملړ کې شامل نشي.
نوموړي همداشان د نړۍ په مسلمانانو غږ کړی دی چې له دوی سره په دې جهادي بهیر کې شریک شي اوهمکارۍ ته ادامه وکړي.
شیخ هبة الله آخندزاده په ګاونډيو خصوصاً په پاکستان او ایران غږ کړی دی ترڅو له دوی سره د امریکایانو په ایستلو کې لاس په کار شي او دوی ته یې توصیه کړې چې داسې څه نور ونکړي چې له امله یې په افغانستان کې د اشغالګرو موده اوږديږي، چې دا کار د افغانستان او ددوی په تاوان دی.
ده په هغو افغانانو غږ کړی چې خپلې بهادرۍ دې پاکستان او ایران ته نه منسوبوي، همدغه افغان ملت دی چې یرغلګر یې همېشه تورمخي شړلي دي او کله به هم اشغال په خپل ملک کې ونشي زغملای، او خپل اطمنان یې دوی ته ښکاره کړی چې کله به هم ملت پدې خبرو سره ددوی ملاتړ پرېنږدي.
همداشان په پیغام کې د هېواد په علماوو او پوهانو باندې غږ شوی چې خپل دینی او وطني مسؤلیت اداء کړي او د هېوادوالو سره په هره برخه کې مرسته وکړي.
په پیغام کې خپلو جنګیالیوته نصیحت برخه هم ځای پرځای شوې ده.