جواد څارګر
په یوناني ژبه کې ددیموکراسۍ لغوي مانا ده “دخلکو حکومت” او ددې مانا دژوند تېرولو هغه کړنلارې دي چې ولس پرې خپل ژوند تېرول غواړي یا په بله مانا، ولس ته په هغه ډول ژوند وربخښل چې دوی یې تېرول غواړي.
په نړۍ کې امریکایان تر بل هر هیواد ددیموکراسۍ چېغې زیاتې وهي، او ددیموکراسۍ دتنفیذ لپاره په میلیاردونو ډالر مصرفوي.
راځئ وګورو چې امریکایان په رښتونې توګه دیموکراسي غواړي او که دهمدې نارې لاندې، په نړۍ کې خپله دیکتاتوري قایمول غواړي!؟
په ۱۹۵۰زېږدیز کال کې دفلپاین په ټاکنو کې د “سي آی ای” لاسوهنې له هیچا پټې ندي، آن تر دې چې سي آی ای مخالف نوماند ته په اوبو کې یو قسم نشیي درمل ورکړل، ترڅو نوموړی نوماند ولس ته په نشه کې ډوب ښکاره سي او بیا یې پر خلاف کمپاین ته زور ورکړي.
په لبنان کې سي آی ای دهغه مهال ولسمشر “کیملي شیمون” او خپلو خاصو انډیوالانو ته په میلیاردونو ډالر ددې لپاره ورکړل ترڅو دهغو نوماندانو مخه ونیسي، څوک چې دلبنان په داخلي سیاست کې د امریکایي لاسوهنو ملاتړي نه ول.
په انډونیزیا کې سي آی ای یو ملیون ډالر د “سویکارنو” او کمونست کوند پر خلاف مصرف کړي ول.
په ویتنام، ګیانا، جاپان، نیپال، لاوس، برازیل، ګواتي مالا، بولیویا، چلي، پرتګال، استرالیا، هیتي، پاکستان، بلغاریا او……. په ټولټاکنو کې لاسوهنې کړي او په میلیونو ډالر یې مصرف کړي
امریکایانو دا ټول مصارف دټاکنو دشفافیت لپاره ندي کړي بلکې دخپل لاسپوڅي کاندید دبریا لپاره یې په لوړه کچه مصارف کړي او ګاللي.
په افغانستان کې ټولټاکنې او له ټاکنو وروسته پرېکړو خو تمامه دیموکراسي رسوا او شرمنده کړه
دډاکټر غني غورځې ـ پرزې او غوڅه بریا دجانکېري دیوې پرېکړې قرباني شوه.
یو پخوانی مصری ولس مشر چې غالباً جمال عبدالناصر و، ویل به یې؛ که چېرې دسمندر په تل کې دوه ماهیان خپلو کې په جګړه کیوزي، دا احتمال شته چې لامل به یې امریکایي لاسوهنه وي.
امریکایي ولس مشر”جیمي کارټر” هغه مهال په لبنان کې امریکایي مظالم بربنډ او روښانه کړل، کله چې یې له سپینې ماڼۍ رخصت اخېست، جیمي کارټر پخپله وینا کې وویل:
موږ لبنان ته پوځیان ولېږل خو که اوس تاسو شام، بیروت او اردن ته ولاړ سئ هلته به د امریکایانو پر خلاف دکرکې توپانونه ووینئ، او دا ځکه چې موږ پر هغوی بې شمېره بمونه وغورځول او ددغو سیمو بېګناه وګړي مو په ډېره بې دردۍ ووژل.
په بیروت کې مو هغه خوار کروندګر، ښځې او ماشومان تر خاورو لاندې کړل چې هیڅ ګناه یې نه وه
نو ځکه خلک موږ شیطانان ګڼي.
دترکیې دوروستۍ کودتا تر شاه هم ژور امریکایي لاسونه شتون لري
امریکایان په سیکولره ترکیه کې د اردوګان له شتون او وجوده جدي خطر احساسوي، او نه غواړي چې سیکولر ترکان یو وار بیا اسلامپالي سي او یا هم اردوګان د اسلامي هیوادونو دمنظم بلاک په جوړولو کې بریالی سي.
په افغانستان کې اسلامي امارت د امریکایي ګټو لپاره خطر و، ځکه یې پر خلاف دصلیبي جګړې اعلان وکړ او نیمه نړۍ یې افغانستان ته اشر کړه
په زرهاوو بمونه یې په افغانستان وورول، سلګونه افغانان یې په وینو کې ولمبول، سلګونه مېندې یې کونډې، رنډې او بورې کړې او سلګونه ماشومان یې بې سرپرسته کړل، په نتیجه کې یې اسلامي نظام ترې واخېست او یو فاسد نظام یې ورکړ
هغه خلک چې له امریکایانو نیکې هیلې لري؛ غولېدلي نه، بلکې ځان غولوي، عارفانه تجاهل کوي او یا هم دپیسو په زور د امریکایي ګټو لپاره ګومارل سوي، ضمیرونه یې کاڼه کړي او خپل ولسونه لاس او پښې تړلي د امریکایانو رحم او کرم ته سپارل غواړي.
دځوان مسلمان نسل دویښتابه پر هیله
