نقیب الله احمدي
هغه مشهور الماني ژورنالست چې پدې وروستيو کې يې دمسلمانيدو اعلان وکړ په اسلام کې دداخليدلو له ټولې کيسې څخه پرده پورته کړې ، نوموړي ويلي چې له اسلام راوړلو وروسته له سختو غبرګونونو سره مخ شو.
مارټن ليګون له “صفا” اژانس سره د اسلام راوړلو د اسبابو په اړه ويلي (چې مسيحيت دهغو پوښتنو په اړه چې ما لرلې قناعت بښونکی ځوابونه نشوای راکولی ، او کوم دين چې ستا پوښتنې ځواب نشي کړلی هغه حق دين نشي کيدلی.)
نوموړي زياته کړه په ۲۰۰۳ ز کال کې زه يمن ته ولاړم ، له علماؤ سره مخ شوم ، له مسلمانانو سره ملاقي شوم ، مسجدونه ته ننوتلم ، هرکله به چې مسجد ته ننوتلم زړه به مې سکون او ډاډ ترلاسه کړ او دسلامتيا او امان احساس به مې کاوه.
نوموړي وويل: دمسلمانانو وروڼو ښه تعامل او نيک چلند زما په مسلمانيدو کې ډير رول ولوباوه ، همدغه راز دخپلې خور مرګ وهڅولم ترڅو دژوند او مرګ دفلسفې په اړه فکر وکړم ، دخپل ژوند دراز په اړه سوچ ووهم .
نوموړي زياته کړه: (په دې باوري شوم چې دا کون ستر اله او رب لري ، ځکه په کون کې هرڅه منظم او دالهي قانون سره سم روان دي هيڅ تغير پکې نه راځي ، لنډه دا چې اسلامي دين زما پوښتنې ځواب کړې ، زما شکونه يې له منځه يوړل .
زما د مسلمانيدو يو سبب دا هم و چې له غزې څخه زيات متاثر وم ، چې کله به مې دشهيدانو جسدونه په زمکه پراته ليدل ، نو له ځان څخه به مې پوښتنه کوله ، آيا دغه انسان دومره بې ارزښته دی چې له مرګ سره سم به هر څه له منځه لاړ شي او که يو رب شته چې دده پوښتنه به کوي او انتقام به يې اخلي ؟ ما به هر وخت دژوند او مرګ په فلسفه کې سوچونه وهل ، له همدې امله زه له غزې سره مينه لرم او زړه مې غواړي چې هلته ژوند وکړم .
دهغو توندو غبرګونونو په اړه چې نوموړی ورسره مخ شوی نوموړي وويل: زما ددې کار په اړه غبرګونونه دا وو چې له خپلې دندې څخه وشړل شوم ، له هغه ګوند څخه وايستل شوم چې ما يې غړيتوب لاره ، دفلسطينيانو دملاتړ له امله يې په ما تهمت پورې کړ چې له يهودو سره دښمني لرې ، سره له دې چې ما دغزې له جګړې څخه رښتوني حقائق نقل کول هغه چې ما په خپلو سترګو ليدلي و، په دې وروستيو وختونو کې اسرائيلو ته زما په ننوتلو هم بنديز ولګيد .
