قاري خالد
پښتانه متل کا چې کومه ډمه ګډېدلای نسوه، پلمه یې وکړه چې میدان کوږ دی، زور مې ټول پر یوې خوا وي ځکه سم څرخ نسم وهلی!.
د طالبانو چټکو بریاو دښمن سرسانده کړی:
د جګړې په ساحه کې موجود عسکر وایي، چې د نه همغږۍ له امله یې ساحې له ګوتو وځي او طالبان پر مخ درومي.
د ولایتي شورا وکیلان وایي، د جنرالانو له لورې پر ولایتونو سیاسي معاملې شوي او د جبار قهرمان استعفا او ټنډارې له هیچا نه دي پټې.
د مزدور دولت د واک ساحه هره ورځ تنګېږي،هلمند، کندوز، لغمان، بغلان او غزني هغه ولایتونه دي، چې محض د والي او ولسوالیو ودانۍ یې د مزدورو چارواکو په لاسو کې دي او ګېرچاپېره یې طالبان پراته دي، چارواکي مجبوره دي، چې ملت ته ووایي ‘میدان کوږ دی’.
د کابل پر واکمنۍ نه یواځې جغرافیوي کړۍ تنګېږي، بلکې پر افرادو یې هم واکمني محدودیږي او په محدودو افرادو واک، د حکومت پر بطلان سره کرښه کاږي، دسیګار ادارې هم منلې چې د حکومت له واکمنۍ پنځه سلنه ساحه نوره هم له واکه وتلې، چارواکي مکلف دي چې ووایي ‘میدان کوږ دی’.
نړیوال اشرباڼي او څلورلاکه زیات و کم مزدور پوځ حتی ددې وس نه لري، چې د لویو لارو امنیت خوندي کړای شي، لامل یې دادی چې جګړه د ولس او پولیس ده.
د ولس سره جګړه دپولیسانو لپاره ناممکنه ده.
ځکه ورځ تر بلې پر پولیس کړۍ تنګېږي، مځکې یې له لاسو ووځي، ولسي نفرت ورسره زیاتیږي، بلواکه او پردي چارواکي کم فراسته پولیس او پوځیان په اوتو ـ بوتو تېرباسي او د خپل ناروا نظام لپاره ترې د سون موادو کار اخلي.
د طالبانو توندو تهاجمي بریدونو ځکه د مزدور نظام بنیادونه ړچولي، چې ولس یې قدم پر قدم هرکلی کوي او د مزدور نظام پر خلاف ورسره یو کېږي، د طالبانو د بریا مهم عنصر هم ولسي ملاتړ دی چې له ځانه سره یې لري.
په هلمند کې طالبانو پر یوه ورځ ۵۸ کیلومتره طولي مساحت د کابل له واکمنۍ باسلی او په جګړه کې په یوه ورځ دومره زیاته ساحه نېول د مخالف وارخطایي جوتوي، ځکه یې افواهاتو ته پاینڅې بډ وهلي.
کله وایي پنجابی پوځ ورسره مرسته کوي، کله وایي کوماندو قطعات یې جګړې ته راوستلي، کله وایي له ټولو ولایاتو یې طالبان هلمند ته ورغوښتي او…… حقیقت دادی، چې د هلمند ولس د ډیموکراسۍ پر خلاف پاڅون کړی او د طالب پر مټو د معیوب او نامشروع نظام رېښې باسي.
د تعجب وړ داده، چې طالبانو هممهاله په کندوز، بغلان، لغمان او غزني کې هم جګړه تونده کړې او آن د ولایاتو مراکز یې کلابند کړي، مګر دوی بیا هم وایي چې له ټولو ولایاتو یې جنګیالي هلمند ته ورټول کړي.
که طالبان له ځانه سره پنجابي پوځیان لري، نامشروع حکومت ولې تر اوسه ونه توانېدل، چې په پنځو سترو ښارونو کې جګړه ده، هلته یو پنجابی جنرال یا عسکر اسیر او بیا رسنیو ته وړاندې کړي؟
طالبانو کابو پنځلس کاله مقاومت وکړ؛ پر پنځلس کاله کې طالب مخالفینو کوم پاکستانی کرنیل وواژه؟ زنداني یې کړ؟ په شپنۍ چاپه کې یې بګرام ته یووړ؟ برعکس د هغو خارجي پوځیانو، ظابطانو او جنرالانو اوږد لیست موجود دی، چې د طالبانو پر خلاف جګړه کې وژل سوي او اسیران سوي دي.
ځکه موږ وایو چې مزدوران پر همدې منطق له مجبورۍ شخوند وهي چې ‘میدان کوږ دی’.
