په تېر پسې……..
«ملکي مورې! تاسو هرومرو د خپل ځان د خوندي ساتلو انتظام وکړئ» نګو ځواب ورکړ. خو په دې ډول نه، بلکه تاسې د دې سازش په اړه سلطان هم خبر کړئ، هغه به پخپله د دي هر څه لپاره مناسب انتظام وکړي.
فاطمې بیګم په اندیښمنې توګه وویل:« او که چیرې د سلطان په راتلو کې ځنډ راشي، نو معلومه نه ده چې دا بدبختان به تر هغه وخته پورې څه څه و نه کړي، او زه به یې څه ډول سمبال کړم ….»
« ملکې مورې! ته ډاډه اوسه.» نګو ورته تسلي ورکړه، «لا تر اوسه د هغې ظالمانو سازش مکمل شوې نه دی، لا تر اوسه هغوی د راج محل د رانیانو سره خبرې کوي، تر هغې چې د هغوی خبرې د عمل مرحلې ته رسیږي نو معظم سلطان به هم د هغوی په خلاف کوم تدبیر جوړ کړی وي.»
« ډیره ښه، زه به اوس لږ څه وکړم.» فاطمې بیګم د خپل محل د داروغې پسي خپله کنیزه ور ولیږله .
« ډیره ښه ملکې مورې! اوس ماته اجازه راکړئ» نګو را پورته شوه«خداې دې تاسې په خپل امن کې ولري»
«دا ته څه وایې، بې عقلې! » فاطمې بیګم هغه ته به زغرده وکتل« اوس خو زه تا بیرته هغو ظالمانو ته نه ورسپارم.»
«ملکې مورې! » نګو ورته په پوره ډاډ سره وویل« زما بیرته ستنیدل ډیر ضروري دي، که چیرې زه بیرته ستنه نه شم نو دا خبره به ډاګیزه شي او بیا به نورې ستونزې راپیدا شي. » نګو په ډیرې سختۍ سره ملکه مور په دې و پوهوله او هغه هم د خبرې په حساسیت و پوهیده.
د نګو د دې اطلاع په اساس ملکي مور خپل یو ګړندی قاصد د سلطان په لور ورولیږه او سلطان د دې خبرې د خبریدو سره سم محمد علي کمیدان دارالسلطنت سرنګاپټم ته د حالاتو د سمیدو په خاطر راولیږه .
محمد علي کمیدان د بنګلور له لارې سرنګاپټم ته نژدې را ورسید او د خپل فوځي ټولي سره یې هلته په « کړي ګټه» کې خیمه ووهله. هلته یې مشهوره کړه چې هغه د «ګرګ» څخه د تیریدو وروسته د حیدر نګر په لور روان دې ځکه هلته حالات کړکیچن شوي دي.
کړي ګټه، د سرنګاپتم څخه یوازې څو میله واټن درلود، د هغه ځایه یې د خپل یوه قاصد په لاسو د سرنګاپټم قلعدار ته یو لیک ور ولیږه، په هغه لیک کې یې غوښتنه کړې وه چې څرنګه چې هغه د کرګ له لارې حیدرنګر ته روان دی، نو په دې خاطر که چیرې قلعدار اجازه ورکړي نو د یوې شپې له پاره به د خپلو کوچنیانو سره د پاته کیدو په خاطر هلته ورشي.
کله چې قاصد د محمدعلي کمیدان د لیک سره یو ځای قلعدار ته ورغی، نو اتفاقا ستر شامیان هم هلته د هغه سره ناست وو. قلعدار د لیک د لوستو نه وروسته قاصد د انتظار کولو لپاره بیرون و لیږه او پخپله یې د ستر شامیان سره په دې اړه سلا مشوره پیل کړه .
قلعدار خپل آند ډاګیزه کړ.
شامیان! د حیدرنګر په لور د سردار محمدعلي کمیدان د ورتلو څخه مقصد دادی چې لا تر اوسه زمونږ د منصوبې اوپلان په اړه چاته د یوه ویښته په اندازه هم معلومات نشته. سلطان او د هغه حواریون په خپلو خپلو کارونو کې مصروف دي»
ستر شامیان په قهقه خندا سره په لوړ اواز وویل: «بهادره قلعداره! هغه به څه ډول منصوبه وي چې راز یې څرګند شی. مونږ په دومره پټه توګه خپل پروګرام پیل کړی دی چې یو غوږ په بل غوږ خبر نه دی. » بیا نو ستا څه فکر دی؟ قلعدار د شامیان څخه وپوښتل: «محمد علي کمیدان ته به کلا ته د یوې شپې د راتلو اجازه ورکړو. په دې کې خوکوم حرج نه شته؟
«او صاحبه، دا هم د پوښتنې خبره ده؟» شامیان ورته وویل: محمدعلي کمیدان ته په کلا کې د یوې شپې د تیرولو اجازه باید ورکړل شي، دا خو به زمونږ د منصوبې له پاره نوره هم ګټوره ثابته شي. که چیرې تر دې وخته پورې چاته زمونږ په نیتونو شک هم وي د محمدعلي کمیدان په راتلو او په کلا کې د شپي په تیرولو به هغه هم له منځه ولاړ شی.
نور بیا………
