تبصره
تېر کال د سپتمبرپه ۲۸مه طالبانو د کندز ښار ونیو، زندان یې مات او تر۶۰۰زیات زندانیان یې له زندانه آزاد کړل.
دا دی د څلورو ورځو په توپیر لکه طالبان چې د کندز ښار د تېر کال د نیولو کلیزه نمانځي یو ځل بیایې تېره دوشنبه پر کندز له څلورو خواو بریدونه پیل کړل او د سهار پر مهال د کندز ښار ته ورننوتل.
دا چې څرنګه د کندز ښار ته طالبان ورسیدل او د ښار شاوخوا امنیتي پوستو له تیریدو یې څرنګه پردولتي مهمو ځایونو بریدونه پیل کړ، دا او دېته ورته سوالونو ځوابول د نورو اړونده مرجعو پورې اړه لري.
تېر کال د کندز ښار د ناټو د بمباریو په دوام له طالبانو څخه بیا ونیول شو؛ خو ټولو هیوادوالو او نړیوالو ولیدل، چې څومره بې ګناه کندزښاریان او په روغتون کې خواخوږي او خدمتګاران ډاکټران پکې په خپلو وینو ولمبول شول.
تېر کال د کندز ښار اربکیان په چور چپاول کې ککړ یاد کړل شول، دا ځل ولایتي چارواکو د جګړې په لومړۍ ورځ وویل، چې د ولسي وګړو د سر او مال په خاطر د طالبانو د بریدونو د ځواب لپاره له هوایي ځواک څخه کار نه اخلي.
د کندز ښاریان په همدې ډاډ له کورونو نه راوتل؛ خو کله یې چې د قالینو پرمارکیټ درنې ډزې او اورلګیدنه ولیده له کندز ښاره څخه ښاریانو د وتلولار ونیوله.
په کندز کې د درې ورځو راپدیخوا د جګړې له امله د کندز د ښاریانو د مرګ ژوبلې او د کورونو او مالونو د سوزولو او لوټلو لوری به د تیر کال په څیر څرګندشي او خپله ښاریان په د کورنیو د غړو د مرګ ژوبلې او مالونو د سوزولو ګوته مسئول لوري ته ونیسي دا که طالب وسله وال وي او که د کندز امنیتی ځواکونه.
د کندز د ښاریانو د سراو مال په نه ساتنه یو لوری هم د ځان د خلاصون لار نه شي موندلای، ځکه په کندز ښار کې د دولتي ځواکونو او طالبانو ترمنځ جګړه دوام لري بله خوا په جګړه کې دخیله نه ده.
که دولتي ځواکونه او یا طالب وسله وال د کندز د ښاریانو د سراومال ساتنه ونه کړي دواړه لوري بیا د کندز په ښار د څه لپاره جګړه کوي او ځانونه پرې وژني، دولتي پولیس په کندز کې ددې لپاره جګړه کوي او خپل ځان یې په مرګ شمیرلی چې د کندز ښاریان د طالبانو له بریدونو وژغوري او طالبان پدې غرض چې د نورو ولایاتو په څیر کندز له بهرنیانو له شتونه او دهغوی د پلویانو له منګلووژغوري.
که دواړه لوري د کندز د ښاریانو د سر اومال ساتنه ونه کړي بیا خو د دواړو لورو جګړې بې هدفه دي.
د کندز ولایتي چارواکي وایي، د جنګ مسؤلیت د پوځیانو په غاړه دی.
طالب وسله وال د کابل تر بندره او خاک کني پورې په شا تمبول شوي او جنګ د خواجه مشهد، خاناباد بندر او چرخاب په سیمه کې دوام لري؛ خو طالبان بیا وایي چې وسله وال یې د دغه ښار په بالاحصار، د پولیسو په پنځمه او د ملي امنیت په ښاري ریاست کې موجود اوجګړه لا دوام لري.
که د دفاع وزارت دا ادعا ومنو چې کندزښار ۹۵سلنه د طالبانو د شتون څخه خلاص دی بیانو د کندز په یادو ساحو کې جګړه د چاسره روانه ده؟
له کندزه د ترلاسه شوو راپورونو له مخې دا مهال که په لږ وخت کې ېې تغیر نه وی موندلی جګړه په ذاخیل، عليخیل، خاکنۍ، باغ شرکت، چرخاب او الچین کې په سختۍ سره دوام لري .
دولتي ځواکونه او طالبان دواړه د جګړې په دوام کې د ښاریانو د خوندیتوب او د هغوی د سر او مال د ساتنې مسئولین دي، باید دواړه لوري خپل خپل مسئولیت درک کړي دا نه چې یو لوری د کندز په نیولو او بل لوری یې د ښاریانو په وژلو او کورونو په سوزولو دفاع ته دوام ورکړي.
