غمجنه قیصه
عائشه رضی الله عنها وایي، چي کله د رسول الله ﷺ لاس را ولوید او سر یي دروند شو نو زه پوهه شوم چي وفات شو، نه پوهیږیدم څه وکړم، وارخطا د مسجد پر هغه دروازه ورووتم کومه چي زما د حجرې له خوا د نارینه و خواته ور وتلې وه او نارې مي کړې: رسول الله ﷺ وفات شو ،رسول الله ﷺ وفات شو!!!
دا وایي زما د چیغو په اوریدلو سره په مسجد کي واویلا ګډه شوه…علي بن ابي طالب رضي الله عنه کښیناستی د ولاړیدو شیمه یي له لاسه ورکړه…او عثمان رضي الله عنه لکه ماشوم په یوه لاس یي دا بل واهۍ…او عمر رضي الله عنه بیا توره را ایستلې وه او ویل یې: که هرچا وویل چي رسول الله ﷺ وفات شوی دی نو سر به ترې غوڅ کړم، هغه (ص)د خپل رب ملاقات ته تللی دی لکه موسی علیه سلام چي تللی و او بیرته به راستون شي…
مګر په ټولو کي چي تکړه وو هغه ابوبکر صدیق رضي الله عنه وو، راغی نبي علیه سلام یي په غیږ کي ټینګ کړ او ویي ویل: اي د خدای ج خلیله! ای دخدای ج دوسته! ای دد خدای ج رسوله! او رسول الله ﷺ یي ښکل کړ او ویي ویل: ای دالله پیغمبره ! په ژوند او مرګ دواړو کي ته مبارک او بختور یې او وروسته مسجد ته ورووت او ویې ویل: چاچي (محمد) (ص) عبادت کاوو هغه نن مړ شو او چا چي دالله جل جلاله عبادت کاوو، نو بیشکه الله نه مري او تل ژوندی دی.
ددې خطبې په اوریدلو د عمر رضي الله عنه له لاسه توره ولویده، عمر رضي الله عنه وایي چي د ابوبکر دا خبرې مې واورېدې نو مي یقین وشو چي رسول الله ﷺ وفات شوی دی.
عمر رضی الله عنه وایي زه بهر ته ووتم د یو داسې ځای په لټه شوم، چي له خلکو لیرې وي او زه یواځې له خپل ځان سره په اوښکو تویولو خپل زړه تش کړم…
کله چي یي رسول الله ﷺ دفن کړ فاطمې رضی الله عنها وویل: ایا تاسو به ځانونه معاف کړۍ چي د رسول الله ﷺ پر مخ مو خاورې ور واړولې…او له قبر سره ودریدله تر ډیره یي فریاد کاوو…
نو وروڼو! زه پوهیږم چي سترګې به مو له اوښکو ډکې شوې وي، او په زړو کي به مو د رسول الله ﷺ د لیدلو تلوسه پیدا شوې وي، مګر د الله په فضل او زموږ سره د کړیو وعدو په برکت به ان شاء الله پر حوض کوثر ورسره یوځای کیږو.
الله ج دى مو ددى سترپيشوا په برکت وبخښې
امین
ټول پر محمد صلی الله علیه وسلم درود شریف ووایۍ
لیکونکی حقيار لوګری
