ليک : احمديوسف سالارزی
دڅوارلسو کالو راپدېخوا افغان ولس ديوې بلې جګړې په اور کې سوزي چې تراوسه يې دحل لياره نه ده موندل شوې ،ددې جګړې پېل کونکې امريکا دهرکال په تېريدو سره ستره دعوا کړېده چې مخالفين (طالبان)دجګړې له زوره پريوتي او نور دجګړې توان نلري،خو کله چې دژمي يخني تېره او ګرمۍ موسم نږدې شي امريکايي جنرالان دپلان له مخې اعلان کړي چې امکان لري په ګرمۍ کې وسلوال جګړه زياته او زمونږ نظامي هدفونه تربريدونو لاندې ونيسي .
دامريکايي جنرالانو دا ډول ويناوې عادي ويناوې نه دي چې دجګړې زیاتوالي او کمزورۍ حالت په وخت کې بدلېږي په اصل کې دامريکا همدا پلان ده چې کله طالبانوته دولسواليو دنيولو زمينه برابره کړي په خپل وخت افغان ځواکونو سره هوايي مرسته ونکړي اوبيا په بله ورځ دهوايي ځواکونو دبمباريو په بې رحمه وژنو دطالبانو څخه نيول شوې سېمې بيا ونيسي ،که امريکا دجګړې دوام نه غواړي نو دولسواليو او يا نورو سېمو دمحاصرې پرمهال هوايي ځواکونه ولې نه ورلېږي ؟
امريکا چې تراوسه پورې يې عسکر په افغانستان کې جنګي حضور لري ،دنيول شوو،ولسواليو دبېرته نيولو توان لري او دا نه کوي چې په لومړي سر کې دافغان پوځ او دولسوالۍ دفاع وکړي.
له بلې خوا افغان دفاع وزارت دخپل بې دفاع پوځيانو مرال په هره پوځي غونډه کې ترپامير او ترسپين غر لوړ يادوي او چې طالبان پرې دمحاصرې کړۍ راتنګه کړي بيا پرناليدلو لارو تښتي ؛وسلې او په پوستو کې موجوده جنګي وسايل ترې په ځای پاتې شي.
طالبان چې په خپل دريځ سره نه امريکا او نه افغان دولت سره دمذاکراتو کولو کې دخپل دريځ نه دڅوارلسو کلونو په تېريدو سره نه اوړي ،ايا داافغان کړيدلی او دهرې جګړې په اور کې سوځيدلی ولس دوژلو لپاره پيدا شوی دی چې هر وخت دمذاکراتو مخالفت کوي ؟
ايا داغريب او بې دفاع ولس اوهغه طالبان چې دهمدې وطن او ګران افغانستان بچيان دي ،په خپل هېواد کې دابادۍ روغتيا ،تعليم او هوسا ژوندلپاره پيداشوي او که دتل لپاره به يې دتند او نه رضا کونکي دريځ له مخې په هره پوسته او نظامي مرکز کې په زخمي زخمي سلګيو کې ژوند له لاسه ورکوي؟
ايا دا دوطن بچيان يوازې دجګړې لپاره موږ زيږولي دي ،چې دنه پخلاکېدونکي دريځ له مخې تردې هره ورځ راکټ او ټوپک په اوږه ګرځي؟
نه ،هېڅکله نه ! د اجګړه او دريځونه خپل حالت ته راوستل غواړي ،ددولت دريځ دومره پڅ او کمزوری دی چې دهرې ورځې په تېرېدو سره پرې ولس اعتبار له لاسه ورکوي.
ددولت دپڅ او کمزوري دريځ په مقابل کې دطالبانو دسخت او تندريز دريځ په منځ کې راګير ولس وژل کېږي ،کورونه يې بمبارېږي،له کورونو بې کوره کېږي او دچور او چپاول لپاره رامنځ ته شوو اربکيانو لخوا دهر اړخيزو ګواښونو او تاوانونو سره مخ کېږي چې دموسی کلا دولسوالۍ ،دکندوز دښار نيوال اوبيا بېرته ددولت لاسونو ته ورتلل يې څرګندمثالونه دي .
دولتي چارواکې په ولس غږ کوي چې دخپل هېواد دژغورنې لپاره دملي اردو ترڅنګ ودرېږئ چې دطالبانو په مقابل کې دهېواد له لاسه وتلې ولسوالۍ بېرته ترکنټرول لاندې راولو.
طالبان دخپل ولس څخه داعلاميو له مخې هم غواړي چې ديرغلګرو او مزدورو ادارو پرخلاف خپل اسلامي او افغاني رسالت سر ته ورسوئ،ترڅو اشغال هېواد له يرغلګرو وژغورو .
بس همدا تند او پڅ دريځونه به وي افغان ولس به تل په همدې اور کې سوزي .بس په افغانستان کې به جګړه راوانه وي . يوه ورځ به دولسواليو ،ياښارونو په نيولو او بله ورځ به ددولت لخوا په بيا نيولو افغانان وژل کېږي ،دا لوبه به روانه وي.
ددولت هېڅ په واک کې نشته ،کندوز ته يې دفاروق وردګ په مشرۍ پلاوی ولېږه ،هلته يې دتښتيدليو چارواکو سره چې لايې دتيښتې ساه نه وه پرځای شوې وليدل .
کابل ته په راستنيدو يې حنيف اتمر ته وويل :دحقيقت موندنې راپوربه اشرف غني ته وړاندې کړې.
نور بیا …
