(کابل ټکی کام ۱۳۹۵ لړم ۲۸) احمدالله مهاجر
په ملګرو ملتونو کې د روسیې د دایمي استازي مرستیال ولادیمیر سفرانکوف وايي، چې ناټو په افغانستان کې د نورو ماموریتونو تر څنګ د غوڅ ملاتړ په ماموریت کې هم ناکامه شوې ده.
سفرانکوف وویل:
«ناټو د غوڅ ملاتړ په چوکاټ کې خپله موخه د افغان ځواکونو روزنه او تجهیز ښودلی وو، مګر لا تراوسه پورې دغې موخې ته نه ده رسېدلې.»
سفرانکوف د وینا پر مهال وویل، د افغان ځواکونو روزنې او تجهیز ته چې څومره ضرورت وو، مګر دغه ماموریت دغه ضرورت نه دی رفع کړی.
سفرانکوف د ناټو ماموریت تش په نوم وباله او په دلیل کې یې وویل، ځکه چې «ترهګر» ورځ تر بلې پیاوړي کیږي او ډېری سیمې یې خپلې کړي دي.
نوموړي د ناټو پر هېوادونو نیوکه وکړه، چې ناټو دې ته هېڅ التفات ور نه کړ، چې په افغانستان کې نا امني په سیمه ییزو هېوادونو کې نا امني جوړوي.
