قاري خالد
په رسنیو کې دطالبانو له لورې د انجینر فیض الرحمن د اعدام کیسه ګرمه روانه ده؛ انجینر فیض څوک و او کومه دنده یې درلوده، شاید اوس دا پوښتنې تر ډېره حل سوي وي.
پوښتنه دا ده چې دمرګونو په دې وطن کې، د انجینر فیض محمد پر وژنه ولې دومره غوبل جوړ سو؟
دلته چې هره ورځ له پوهنتونه محصلین کاږل کېږي، او بیا د زور واکانو له لورې په شخصي او پټو زندانونو کې داسې تعاذِب ورکول کېږي چې دمحصل پر مرګ تمامېږي؛ ولې څوک ږغ نه پورته کوي؟
څو ورځې وړاندې دوردګو په نرخ ولسوالي کې دنصیب الله پر نوم ځوان محصل چې دمامور عیان ځوی و، کلي ته څېرمه دوالیبال میدان ته روان و چې د اردو عسکرو وویشت او شهید یې کړ؛ نصیب الله له څوارلسم ټولګي فارغ و، محصل و، بېکاره و او دکار په لټه کې تر ایران هم ولاړ
دا چې نصیب الله د اردو عسکرو شهید کړی و، په شهادت یې دچوپتیا لامل همدا دی، او دیوه متهم انجینر په وژلو های سوران ځکه زور اخلي چې طالبانو وژلی.
طالبان وایي مجرم فیض الرحمن یې دده تر اقرار، بېطرفه پلټنو او کره ثبوتونو، له موندلو وروسته، ددرې ګونو محاکمو پر پرېکړه اعدام کړی او نږدې ورځو کې به یې ویدیو درسنیو له لارې دهیوادوالو سره شریکه کړي.
که هدف مطلق افغان وژنه غندل وي؛ ولې دیوې خوا وژل په درز غندل کېږي؟ ولې دیوې خوا په صحرایي محاکمو چوپتیا غوره کېږي، ولې دیوې خوا وحشت ته توجیهات لټول کېږي؟
درځئ په خپله قاضیان سئ؛ دشهید ریان وژل عادلانه ول؟ دکندهارۍ شاعرې مینه انتظار دمحصلې خورکۍ دوژلو امر کومې محکمې ورکړی و؟
دشهیدنصیب الله دشهادت جواز، عسکرو له کومه اخیستی و؟
په لسګونه پېښې سته چې چا یې په اړه سپڼ هم ندی کړی؛ که وحشت غندل هدف وي، که افغان وژنه تقبیحوَل هدف وي، ولې دهر افغان وژنه نه غندل کېږي؟
طالبان وایي فیض الرحمن دوی ته زیات کارونه هم کړي، په کابل کې یې څو ځایه دچسپکي بمانو پر مټ انفجارونه کړي او په پای کې یې دملي امنیت ادارې سره تار اچولای او دپنځه لکو افغانیو مقابل کې یې ډاکټر مېروئس په شهادت رسولای.
که دطالبانو دعوه رښتیا وي؛ دیوه متنازع او متزلزله شخص لپاره اوښکې تویول دکومو اصولو پر بناء وطن پالنه ده؟
همدغه اوښکې که دیوه رښتیني افغان لپاره وبهول سي، تر دې به یې ګټه هم زیاته وي او د افغان وژنې مخه به هم تر یوه حده ډب سي.
له بدمرغه دې وطن کې اوښکو هم، دوینو په څېر سیاسي رنګ خپل کړی، هیڅوک دچا په ویر رښتونی ماتم نکوي بلکې کوښښ کوي محض خپل سیاسي حریف بدنام او دځان او ګوند لپاره ولسي همدردي پیدا کړي
په رُڼا ورځ اختطافونه دوام لري، له ډریورانو موټران تښتول کېږي، له مکاتبو هلکان تښتول کېږي، صرافان وژل کېږي، تجاران تهدېدېږي او په اثبات رسېدلې ده چې ددې ټولو ناخوالو تر شاه د امنیتي ادارو کارمندان لاس لري، مګر دا نن چې دفیض الرحمن پر وژنه اوښکې تویوي، دوی ټولو پر دې روزمره ناخوالو سیاسي چوپتیا غوره کړې.
زه تعجب کوم چې دا خلک چې له طالبانو دشواهدو غوښتنې کوي؛ دوی کله په طالبانو باور لري؟
که طالبان شواهد وړاندې کړي؛ دوی به بیا دا نه وایي چې له دې سړي دکېبلو پر زور اقرار اخیستل سوی؟
راځئ په ټول اخلاص او صداقت د افغانوژنې پر ضد ږغ پورته کړو، هیڅ قاتل ته توجیه ونه لټوي، دهر قاتل اعدام وغواړو، دهر بېګناه پر قتل اوښکې وبهوو او دهیڅ کوم وژل سوي پر وینو سیاست ونکړو.
