احمدالله مهاجر
غاښونه د عمر په زیاتوالي سره زېړیږي او له خولې څخه مو ناوړه بوی خیږي، له همدې کبله نه شئ کولای، چې په خلاص زړه په مجلسونو کې وخاندئ او خبرې وکړئ، د دغې ستونزې د رفعې لپاره ګڼې لارښوونې شوي دي، خو معاصرو ډاکټرانو یې د رفعې لپاره نوې طریقه ښودلې ده، چې تر ډېره حده منتجه ثابته شوې ده.
ډاکټران وايي، هغه مشروبات چې رنګ ولري، باید د (سټرا) په ذریعه وڅښل شي او د سوډا واټر، کافي او الکولي موادو له څکلو څخه باید ډډه وشي.
د طبي معلوماتو پر اساس، یخ او معتدل مشروبات د ګرمو مشروباتو په نسبت ډېر مفید دي، باید استفاده ترې وشي.
هایدروجن پروکساید، چې فورمول یې (H2O2) دی، عموماً په زېړ رنګه بوتلونو کې ساتل کیږي او د زخمونو د مینځلو لپاره استعمالیږي، چې په درملتونونو کې تر ۲۰ افغانۍ پورې قیمت لري.
لومړی طریقه:
د غاښونو د سپینوالي لپاره د امریکا د غاښونو د ساتنې ادارې له پلټنې وروسته وايي:
۳٪ هایدروجن پروکساید (ML۱۰) به په خوله کې واچوئ، د یوې دقیقې لپاره به یې غړ غړه کړئ او د خولې هرې برخې ته یې ورسوئ، که په خوله کې مو میکروبونه وي، نو ځګونه به وکړي او له یوې دقیقې وروسته به مو غاښونه په مسواک یا د غاښونو په برش سره ومینځئ او د غاښونو له ځلا څخه به برخمن شئ او خوله به مو له میکروبونو څخه وساتل شي.
دویمه طریقه:
دوه قاشغې هایدروجن پروکساید او درې قاشوغې د خوراک سوډا سره ګډ کړئ او بیا یې ښه سره ووهئ، ترڅو کریم ترې جوړ شي او بیا په کمه اندازه د غاښونو کریم پکې ګډ کړئ چې ذایقه پیدا کړي، همدا ګډ شوي مواد په غاښونو باندې د برش په واسطه سره په دایروي شکل ووهئ، تر هغه چې ټول غاښونه پرې وپوښئ، او تر درې دقیقو پورې به یې پرېږدئ، وروسته له هغه به خپل غاښونه د مسواک او یا د غاښونو د کریم په واسطه سره پاک پرې مینځئ، تر څو ښه صفا شي، دا کار تاسو د پنځو ورځو لپاره وکړئ، ستاسو غاښونه مو د صدف په شان ښکلي شي.
