دحضرت موسی علیه السلام په قصه کې درسونه او سبقونه

لیکوال: مولوي محمد عطاءالحق “الموسوي”

نشر او ترتیب:  رائد

پرلپسې لسم او یولسم درس ـ

د حق داعی بايد پخپل منصب شکر ګذار و اوسي.

هوکې! د الله پاک ﷻ په نعمتونو کې تر ډيرو ستر او خوږ نعمت د الله ﷻ دين ته خدمت کول دي . دې نعمت ته الله پاکﷻ پخپلو بنده ګانو کې غوراوی او انتخاب کوي، څوک يې چې خوښ شي هغه ورته انتخاب کوي . لکه الله ﷻ فرمايي :

﴿وَاللَّهُ يَخْتَصُّ بِرَحْمَتِهِ مَنْ يَشَاءُ… )   (البقرة، 105)

ترجمه :  د الله پاک ﷻ چې چاته خوښه شي پخپل رحمت يې خاص کوي.

همدا نعمت دی چې په لاره کې يې د الله ﷻ بنده ګان له خپل سر، مال ، هستي نيستي او هرڅه څخه تيريږي ، په دې لاره کې ستړيا هم خوند لري، مرګ ، درد او کړاو هم  مزه لري . خو دا خوند هغه څوک محسوسولای شي چې د الله ﷻ له لوري ځانګړې پيرزوينه پرې وشي .

له دې نعمت نه چې څوک برخمند شي بايد شکر پرې وباسي . الله پاک موسی ؑ   ته دا نعمت ورپه برخه کړی، بيا يې هغه ته په دې نعمت باندې د شکر ايستلو امر هم کړی . الله پاک ﷻ فرمايي :

﴿ قَالَ يَامُوسَى إِنِّي اصْطَفَيْتُكَ عَلَى النَّاسِ بِرِسَالَاتِي وَبِكَلَامِي فَخُذْ مَا آتَيْتُكَ وَكُنْ مِنَ الشَّاكِرِينَ )   (الاعراف،144).

ترجمه : هغه (الله ﷻ) وفرمايل : ای موسی! ته مې په ټولو خلکو کې پخپلو پيغامونو او له ما سره په خبرو کولو غوره کړی يې نو څه مې چې درکړي هغه ونيسه او د شاکرينو له جملې څخه شه .

پورتني آیت کې ګوور چې الله پاک په دې نعمت باندې موسی ؑ  ته د شاکر کيدلو امر کوي .

يوولسم درس :

د حق داعی بايد زيات زيار وباسي او د دعوت په لاره کې بايد هيڅ ستړيا محسوسه نکړي .

د الله پاک ﷻ فضل او کرم دی د فتنو، فسادونو او کفري دسيسو په دې دور کې بيا هم دين ته د خدمت له پاره وسائل خورا زيات او پراخه دي ، الحمد لله علماوو ، استادانو ، متخصصينو، متدینو ليکوالانو او مصلحو داعيانو په بيلا بيلو ژبو کتابونه ، مجلې، جريدې ، رسائل ، ورځپاڼې ، صوتي ويناوې ، وعظونه او نور ډير څه ترتيب کړي ، حتی که څوک استفاده ترې کول غواړي انټرنيټ کې په زړه پورې خورا زيات مواد شته چې د هرې شعبې د حق داعی کار ترې اخيستلای شي . الله مکړه کيدای شي داسې وخت راشي چې بيا دا وسائل په دومره پراخه کچه او په دومره آسانه پيدا نشي .

د حق ګرانه داعی! لنډه دا چې الله پاک ﷻ تاته ډير څه برابر کړي ، يواځې ستا سعيې ، هڅې  او فعاليت ته اړتيا ده ، که ستا زيار او کوښښ وو اسلامي ټولنه او ډير اسلامي حرکتونه به د کاميابی په لور ګامزن شي ، نو مټې را بډوهه او خپل عزم لا کلک او هڅې لا ګړندۍ کړه او د دين کار ته اوږه ورکړه .

الله پاک ﷻ موسی ؑ  ته هم هرڅه ورکړي وو بيا يې ورته پکې د  کوښښ او زيار امر کړی وو . تاسې لانديني آيت ته زير شئ الله پاکﷻ فرمايي :

﴿ وَكَتَبْنَا لَهُ فِي الْأَلْوَاحِ مِنْ كُلِّ شَيْءٍ مَوْعِظَةً وَتَفْصِيلًا لِكُلِّ شَيْءٍ فَخُذْهَا بِقُوَّةٍ …) (الاعراف،145).

ترجمه :  او هغه ته مو په تختو کې هر ډول نصيحت او په بشپړ ډول د هر څه تفصيل ليکلی وو ، نو ( ورته ومو ويل چې) وايې خله په پوره زور سره . ( منګولې پرې ولګوه).

بل ځآی ورته فرمايي:

﴿ وَأَنَا اخْتَرْتُكَ فَاسْتَمِعْ لِمَا يُوحَى )   (سورة طه، ۱۰)

ترجمه :  او ته ما غوره کړی يې نو غوږ ونيسه  هغه څه ته چې وحيه کاوه شي .

تاسې وګورئ! الله پاکﷻ  موسی ؑ  متوجه کوي ورته فرمايي چې : د کوم شي وحيه درته کيږي هغه ته غوږ کيږده، په غور يې واوره .