یو ماشوم ولې ژاړي؟
صابر خپلواک
ځينې ماشومان ارام او ځينې يې ډېر ژړاند وي .ژړا د ماشومانو ژبه ده؛ دوى د ژړا په واسطه خپله لوږه، تنده، درد، رنځ، وېره او نور احساسات بيانوي.
مېندو ته په اول سر كې مشكله وي، چې د ماشوم د ژړا علت ومومي، البته د وخت په تېرېدو سره مور د ماشوم د ژړا له ډوله د هغه په مطلب پوهېداى شي.
ماشوم چې كم غټ شي، د لوږې لپاره يو رقم ژاړي؛ چې ټوكر يې لوند وي بل ډول او كه د نس درد وي بيا په بله بڼه ژاړي، نو كه مور ورته ځيره شي، پرې پوه به شي چې، څه شی غواړي.
كه د ماشوم د ژړا پر علت پوه نه شوئ؛ نو دغه لېست به يې په موندلو كې درسره مرسته وكړي.
- لوږه
- لوندوالی
- خوب
- غواړي چې په غېږ كې يې ونيسئ
- د معدې تكليف به لري
- ټېغ به يې بند وي
- ډېره يخني يا زياته ګرمي به وي
- د بدن يو ځاى به يې په تكليف وي
- غاښونه به يې راوځي
- بهرني تحريكونه به زيات وي
- بهرني تحريكونه به لږ وي
- ماشوم به ناروغ وي
