اشرف غني د انتخاباتو په وخت اولس سره دا ژمنې کولې چې هیواد ته به امن راولي ، همدا قسم وعدې پخوانی ولسمشر حامد کرزی هم کولې او د همدې درواغجنو وعدو په سر یی دوه دورې تیرې شوې خو اولس سره يی کړی ژمنه سرته ونه رسوله .
اوس اشرف غني هم د کرزی په پله پل ایښی دی یوازې داولس سره ژمنې کوي خو د یوې ژمنې د سرته رسولو څرک چیرته نه ښکاري.
پخوانی اولسمشر په اصل کې نه غوښتل چې په افغانستان کې جګړه پای ته ورسیږي او دخپلو مخالفو وسلوالو طالبانو سره د مذاکراتو لپاره یی د سولې شورا جوړ کړ، او د مشري لپاره يی استاد رباني وټاکه هغه استاد رباني چې کلونه کلونه دشمالي ټلوالې په مشرۍ د طالبانو سره جنګیدلی ؤ، یو شخص چې ټول وخت د مخالف لوري سره جګړه کړي وي هغه به څرنګه ددوه لورو ترمنځ سوله وکړي، څوک چې خپله د جګړې یو لوری وي هغه د سولې لپاره مشر ټاکل داولس په سترګو کې خاورې آچول دې.
دولتي چارواکو او یو شمیر رسنیو د استاد رباني په وژنه ولیکل چې استاد دسولې قرباني شو خو مونږ وایو چې استاد دحامد کرزی د فریب او دخپلې بې کفایتۍ قرباني شو.
دیوي خوا استاد رباني دیو لورې جګړه کونکی شخص ؤ او بل دا چې دسولې اهلیت یی پدې نه درلود چې دسولې صلاحیت ورسره نه ؤ بیايي ځوي هم همداسې ؤ.
اوس چې اشرف غني قانوني دشمالې ټلوالې لخوا دسولې دشورا رئیس وټاکه دائی هم یو غیرقانوني کار ؤ چې وئی کړ ، شمالي ټلواله هیڅ وخت په افغانستان کې سوله نه غواړي ، نه د سولې طرفداران دي او نه دسولې د اشخاصو سره مرسته کوي او نه داستاد رباني او دهغه د ځوي په څیر دسولې صلاحیت لري . که اشرف غني وايي چې قانوني په یو شمیر اشخاصو کې تجربه لرونکی شخص دی مونږ وبه یی ورسره ومنو خو بیا په کار وه چې قانوني یی د بهرنیو چارو وزیر ټاکلی وای چې د هند سره په نږدې اړیکو یی دافغانستان اقتصاد پیاوړي شوی وای؛ چیرته به يی په بل هواد کې یا په ملګرو ملتونو کې دافغانستان د ځانګړې نماینده په توګه ټاکلی وای چې د خپلې تجربې په اساس ئی دهیواد د منافعو لپاره کار کړی وای.
دسولې د شورا درئیس په توګه داشرف غني لخوا دقانوني ټاکل یو غیر قانوني عمل پدی هم دی چې که قانوني وړتیا لري نو په نورو کارونو کې به یې خپل وړتیا ښودلی وای.
که د قانوني نه تیر شو مونږ ته جوت دی چې خپله اشرف غني او ډاکټر عبد الله دطالبانو سره د سولې واک او اختیار نه لري نو قانوني به څه واک ولری؟ او څه اجراءات به په دې هکله وکړي؟
په آخر کې دډیرو خلکو په ذهنونو کې دا پوښتنې ګرځې چې د سولې دشورا ریاست ولې د شمالي ټلوالې په قسمت کې لیکلی شوی دی؟ آیا په افغانستان کې دخیر او صلحې خلک هم دوي دې؟ آیا په افغانستان کې دصلحې وړتیا بل چا سره نشته ؟ دوی چې ټول عمر په جنګونو کې تیر کړی څنګه به صلحې ته مخه وکړي؟
