تبصره
د امریکا نوي حکومت چې د افغانستان په اړه یې تر اوسه غوڅه پالیسي نه ده اعلان کړې افغان چارواکي وارخطا و که امریکا افغانستان سره د امن په ټینګښت کې اوږه ورنکړي راتلونکی به یې د حکومت په نسکوریدو تمام شي.
د امریکا د ملي امنیت سلاکار مک ماسټر د جنوبې اسیا د حالاتو د ارزونې په موخه افغانستان ته په لومړي ځل راغی چې څه ناڅه ډاډ یې افغان حکومت ته ورکړ او افغان چارواکو د مک ماسټر په ډاډ یو ځل بیا د نیم ژوند سا واخسته.
له افغانستانه وروسته مک ماسټر په اسلام اباد کې د هغه هېواد د لومړي وزیر د سلاکار سرتاج عزیز سره په لیدنه کې هم د افغانستان په اړه خبرې وکړې چې سرتاج عزیز مک ماسټر ته په افغانستان کې د ناامنیو په زیاتوالي خپله اندیښنه وښودله.
د جنوبي اسیا د حالاتو د ارزوني سره سره د مک ماسټر د سفر اصلي موخه د افغانستان د موجوده حکومت برخلیک ټاکل و چې په دې اړه یې په هند کې د هغه هېواد د صدراعظم نرندرامودي سره د افغانستان د برخلیک ټاکلو خبرې وکړې.
مک ماسټر او مودي، د افغانستان په حالاتو د بحث وروسته پریکړه وکړه چې په افغانستان کې د حکومت د مخالفو وسله والو پر خلاف پرېکنده دریځ وساتل شي. دوی وویل همدا پرېکنده دریځ افغانستان د موجوده مخ په ځوړ حالت څخه ژغورلای شي.
د مک ماسټر هندي سیال اجیت دوول هم په دې لیدنه کې موجود ؤ، اجیت د افغانستان په اړه د امریکا او هند په ګډ دریځ سره وویل چې موږ باید افغانستان د نیابتي جګړې څخه وژغورو او یو روښانه برخلیک افغانانو ته په لاس ورکړو.
د هند په سفر کې د مک او مودي د لیدنې دا ټکې ډیر مهم دی چې په افغانستان کې د طالبانو مخ په زیاتوالي ګواښونو باندې باید ژور غور وشي. یعني که وسله وال طالبان، وسله وال کیږي موږ باید د افغان حکومت سره نورې پوځې مرستې هم وکړو چې په دې دریځ سره به د افغانستان برخلیک د یوې بلې جګړې په پیل تمام شي.
په موجوده حال کې د افغانستان برخلیک په ناڅرګند لورې روان دی؛ اشرف غني د خپل حکومت د ښې حکومتولۍ د دندې لپاره ګمارل شوی ضیاء مسعود ګوښه کړ. چې د یوې خوا یې د جمعیت د ګوند او په ځانګړې توګه د شمالي ټلوالی سره ټکر ته لاره برابره کړه.
که شمالي ټلواله او د جمعیت د مشرتابه موجوده نوماند مشر، عطا محمد نور د اشرف غني سره ډغرې پیل کړي فکر نه کوو چې اشرف غني به خپل برخلیک ټاکلو ته موقع پیدا کړي. هغه هم په دې خوښ دی چې د افغانستان حکومت جان کیري جوړ کړی او برخلیک به یې اوس مک او مودي ټاکي.
