م خاموش
اشرف غني د ولسمشریزو ټاکنو پر مهال د افغانستان په بیلا بیلو ولایاتو وګرځید؛ د افغانانو سره یې د ولسمشر کیدو په صورت کې ژمنې وکړې. خو چې ولسمشر شو د هېواد بیلا بیلو هغو ولایاتو وګړو سره یې په کړو ژمنو خاورې واړولې د کومو ولایاتو چې یې سفرونه کړي و.
په دې ولایاتو کې یو د پکتیا ولایت دی. له کومې ورځې چې اشرف غني د جان کیري په منځګړیتوب نیم واک ترلاسه کړی له هغې ورځې یې د نورو ولایاتو په څیر د پکتیاوالو سره په کړو ژمنو د خوب سترګې پټې کړې دي او تر هغې یې ویښېدا امکان نه لري څوپورې چې ۱۷ مشر وي.
په حقیقت کې خو اشرف غني د پکتیاوالو سره ښه کوي چې ”غت غت“ بمونه پرې نه غورځوي. په افغانستان کې جهادي مشرانو خپل ولس په راکټونه ویشتلی دی. او چې څوک ولسمشران شوي دي د غټوغټو بمونو د غورځولو غوښتنې یې له امریکا کړي دي؛ پکتیاوال دې د اشرف غني احسان ومني چې ژوندي یې پریښې دي.
پکتیاوالو ته یاد نه دي چې د کمونستي منحوس رژیم له ړنګیدا وروسته له د یرش زرو زیات کابل ښاریان د کابل د ښاروال او چهار اسیاب د ولسوال ترمنځ د ارګ د نیولو په جګړه کې شهیدان شول؟ افغانان تل د واک لیونیانو وژلي دي او لا یې وژني. پکتیاوالو له ژمنو تیرشئ، د سر خیر غواړئ! که څه مو وویل په ترهګرو کې به وشمیرل شئ؛ بادارته به اشاره وکړي د بمونو مور څه چې د بمونو پلار به درباندی وغورځوي.
هغه چا چې اشرف غني ته او که یې عبدالله ته رایه ورکړې ده هغوی ورسره د کړو ژمنو د پوره کیدا حقدار دي. پکیتاوال به اوس راویښ شوي وي چې ولې مو غني ته رایه ورکړې ده؛ خو دا غږ ویښ اوري، اشرف غني لا د غفلت په خوب ویده دی. هغه اوس د را ویښ شویو پکتیاوالو غږ (ژغ) نه اوري. لکه څرنګه چې د پکتیاوالو ژغ نه اوري دا رنګه د ټولو افغانانو ژغ نه اوري.
