(کابل ټکی کام ۱۳۹۶غوايی ۲) الماس خدرخېل
تېره ورځ ماسپښين مهال شاوخوا دوه بجې وسله والو طالبانو بلخ کې د پوځ پر ۲۰۹ شاهین قول اردو ډله ییز برید وکړ، چې پکې سلګونه پوليس افسران او عسکر ووژل شول.
د بلخ د ولایتي شورا یو غړی ذبیح الله کاکړ وايي، په دغه برید کې چې لسو سرتيرو بریدګرو کړی، نږدې ۶۰ افغان پوځيان وژل شوي او په همدې شمېر نور ټپيان دي.
په ورته وخت کې، ځينو رسنيو ويلي چې دغه بريد کې تر ۱۳۰ زيات عسکر وژل شوي او لږ تر لږه ۶۰ نور ټپيان دي.
افغانستان کې د امریکايي ځواکونو د قوماندانۍ ویاند جان توماس ویلي، پر شاهین قول اردو د برید پر مهال ښايي پنځوس ۵۰ افغان پوځيان وژل شوي وي.
خو د ملي دفاع وزارت بيا وایي، چې د دغه برید نهايي مرګ ژوبله لا هم نه ده معلومه.
طالبانو د دې بريد مسئوليت په غاړه اخيستی او وياند يې ويلي چې دغه بريد کې لس تنو فدايي طالبانو برخه درلوده.
د طالبانو وياند ذبيح الله “مجاهد” همدا راز ويلي چې په دغه بريد کې هغه څلورو نفوذي طالبانو هم برخه درلوده چې څو کاله يې په شاهين قول اردو کې دنده تر سره کړې وه.
ښاغلی مجاهد وايي، چې بريد کې د لوړ پوړو چارواکو په ګډون تر پنځه سوو زياتو دولتي سرتيرو ته مرګ ژوبله اوښتې ده.
هغه وويل، بريد د شپې تر لسو بجو پورې دوام درلود او په تازه خپره کړې خبرپاڼه کې يې د هغو بريدګرو نومونه خپاره کړي چې په دې بريد کې يې ګډون کړی و.
طالبان وايي، دغه بريد يې د خپلو دوه واليانو د کندوز والي ملا عبدالسلام او د بغلان والي مولوي لعل محمد محمدي او يو شمير نورو مجاهدينو انتقام و او په خبره يې چې په شمال زون کې دغه قل اردو د قوماندې مهم مرکز و.
نوموړی زياتوي: (د تیرې ورځې عملیات او په هغو کې د دښمن سلګونه عسکر وژل او ټپي کیدل د دښمن د ناځوانمردانه عمل غبرګون وو چې د مجاهدینو د انتقام جذبه يې را پارولې وه او په تلوار سره يې دغه عملیات طراحي او پياده کړل).
