(کابل ټکی کام ۱۳۹۶غوایی ۷) الماس خدرخېل
کابل ټکی کام ته يوې باوري سرچينې وويل، چې دا مهال د حزب اسلامي مشر ګل بدين حکمتيار د لغمان ولايت مرکز مهترلام کې دی او تمه ده چې سبا ته به په يوه غونډه کې راڅرګند شي.
په ورته وخت کې د لغمان ولايت مطبوعاتي دفتر څخه په خپره شوې خبرپاڼه کې ويل شوي، چې حکمتيار به سبا د جمعې په ورځ په لغمان کې د يوې غونډې په ترڅ کې خپل حضور څرګند کړي.
نوموړی اوس مهال د دغه ولايت په ميلمستون کې ميشت دی.
د حزب اسلامي سرچينې وايي، چې نن د حزب لوړ پوړي غړي او پلويان له کابله لغمان ته ورسيدل او له حکمتيار سره يو ځای شول.
له تېرو څو ورځو راهیسې داسې ګنګوسې وې چې ښاغلی حکمتیار په لغمان کې دی او له همدې کبله امنیتي تدابیر هم ورته نیول شوي و.
يوې باوري سرچينې ويلي، د حکمتيار د امنيت چارې هغې قطعې ته سپارل شوي چې په تېرو څو مياشتو کې د پاکستان د خيبر پښتونخوا ايالت سره نږدې په شمشتو پنډغالي کې د نوموړي د امنيت ساتلو په موخه روزل شوې وه.
تېره ورځ په کابل کې د حزب اسلامي له خوا په یوه خپره شوې خبر پاڼه کې ویل شوي و چې دغې ګوند پورې مربوط د بندیانو لومړۍ ډله به چې اويا تنه دي د ثور په اتمه د جمعې په ورځ د افغان دولت له زندانونو خوشې شي.
تېر کال د سپتمبر په مياشت کې ګډ حکومت او حکمتيار د سولې تړون لاسليک کړ او په دې توګه حکمتيار د افغان دولت او په افغانستان کې د ميشتو بهرنيو ځواکونو مخالفت ته د پای ټکی کېښود.
