تبصره
په ۱۳۵۷هـ ش کال د ثور د میاشتې په ۷مه، تور مخو کمونستانو په افغانستان کې د غوایي کرغیړنه کودتا وکړه، چې د افغانستان په پاکه خاوره یې د لینین کفري نظام ته لاره برابروله. اصلا په افغانستان کې د وینو تویولو او تباهیو پیل له همدې د (غوایې له اوومې) پیل وشو.
تور مخو کمونستانو چې د افغانستان په پاکه او مقدسه خاوره د لینین د نظر پلي کولو ته زمینه برابروله، په مقابل کې یې افغان ولس په تش لاس خو د خپل ايمان په زور د خپلی خاورې، ناموس او مقدس اسلام د دفاع لپاره ولسی پاڅون وکړ، چې په همدې ولسي پاڅون سره د کمونستانو ټول ارمانونه له خاورو سره خاورې شول.
که څه هم د کودتا د پیل سره روسي غلامان (کمونستان) په یوه خوله نه و؛ په خلق او پرچم ګوندونو ویشل شوي و، چې د پرچمیانو مشري ببرک کارمل او د خلقیانو مشري نورمحمد ترکي کوله. او له اولې ورځی یې په خپلو کې اختلاف لاره خو افغان مسلمان مجاهد ملت ته سره یو و.
د کمونستی کودتا دوه ورځې دمخه چې د دوی یو غلام ملګری، خیبر ووژل شو، د ترکي په شمول (۷) کمونست مشران په زندان کې و. پاتې کمونستانو لکه سلیمان لایق او کشتمند د مظاهرو پر ځای د کودتا پلان پیل کړ.
د نورمحمد ترکي، ببرک کارمل، بارک شفیعی، سلیمان لایق، کشتمند، امین او څو نورو ملګرو د پلان سره سم د جنرال قادر لخوا د هوایي ځواک او د کابل د څلورمې لیوا قوماندان نور احمد نور لخوا پر ارګ د زرهدارو په برید سره کودتا پیل شوه، چې ډاکټرشاه ولي، دستګیر پنجشیري، عبدالحکیم جوزجانی او نورو ملګرو یې په ولایاتو کې د کودتا مشري په غاړه لرله.
جنرال قادر د هوایي ځواک او نور احمد نور په زرهدارو له ارګه دوړې پورته کړې. که څه هم د ۸۸مې لیوا قومندان خلیل الله د سردار محمد داود په پلوۍ جګړه وکړه خو هغه هم بمبار کړل شو.
همدا توره ورځ وه چې دافغانستان مجاهد ولس یې له پېله تر نن ورځې پورې په خپلو وینو کې لمبیږی.
له هغې ورځې راپدېخوا چې په افغانستان کې هر څاڅکی وینه توییږي مسئولیت یې د تور مخو کمونستانو (د ثورد کودتاچیانو) پرغاړه دی.
کمونستانو د خپلو کرغیړنو او پلیدو اعمالو په پیل سره په افغانستان کې په مشایخو، علماءو، قومي مشرانو، علمي شخصیتونو، ادبپوهانو او نورو هغو اشخاصو باندی خپله خاوره سور اور کړه، چې د دوی د لینیني نظر پر خلاف به یې غږ پورته کاوه.
له هغې ورځې چې تور مخو کمونستانو په افغانستان کې د ثور توره کودتا کړې ده که د مجاهدینو د خپل منځیو جګړو، او یا نن ورځ چې په افغانستان کې کومې وینې بهیږي د دې ټولو بد بختیو عاملین تورمخي کمونستان دی.
بد بختانه چې نه یو شمیر جهادي مشرانو او هم د طالبانو په نظام کې دې د افغان ولس تاریخي دښمنانو ته وړ سزا ور نه کړل شوه، بلکې په حکومتي ادارو کې هم ومنل شول چې د کمونستانو د کودتا تر څنګ د افغان ولس او د مقدس جهاد د لارې د شهیدانو سره یوه بله جفا وشوه.
کمونستان په ځای د دې چې د خپلو اعمالو سزا ورکړل شي په ډير تاسف سره په حکومتي ادارو کې ومنل شول.
په بهرنیو هیوادونو کې چې په کډوالو افغانانو کومې سختۍ تیریږي او یا په داخل د هیواد کې کومه بدبختې روانه ده؛ د دې ټولو عاملین تور مخي کمونستان دي.
افغان ولس به د افغانستان په تاریخ کې دا توره ورځ هر کال په غونډو کولو سره غندي چې نسل په نسل به افغان ولس ته د تور مخو کمونستانو کرغيړن اعمال ور په يادوي .
