(کابل ټکی کام ۱۳۹۶غبرګولی ۱۶) الماس خدرخېل
څو شيبې وړاندې د کابل د نهمې حوزې اړوند په تر ټولو خوندي سيمه کې درنه چاودنه شوې، چې د مرګ ژوبله په اړه يې کره معلومات نه دي ترلاسه شوي.
د کابل د امنيې قوماندانۍ چارواکي وايي، چاودنه د نهمې امنيتي حوزې په مربوطاتو د شش درک په سيمه کې د يوه توغندي د لګېدو له امله رامنځته شوې ده.
يوې سرچينې کابل ټکی کام ته وويل، چې دغه توغندی د هند سفارت پر مېلمستون لګېدلی خو د تلفاتو په اړه يې معلومات نه لري.
د پېښې ځای ته نږدې د قاطع ملاتړ ماموريت قومانداني هم پرته ده.
دا په داسې حال کې ده، چې دمګړۍ په کابل کې د ۲۷ هېواد تر منځ د کابل پروسې ناسته روانه ده او د ترهګرۍ سره د مبارزې او نورو اړوندو موضاعتو په اړه پکې بحث روان دي.
تر دې دمه د پيښې مسئوليت کومې وسله والې ډلې په غاړه نه دی اخيستی.
وخت ناوخت وسله والو طالبان د باګرام هوايي اډې په شمول په يو شمير دولتي ودانيو د ميزايلو او توغنديو وارونه کوي.
د مرګ ژوبلې په اړه کره مالومات نه دي ورکړل شوي.
