قاري خالد
پرون ورځ دسولې دتشریفاتي او تمثیلي شوری نوې تګلاره تصویب شوه چې له مخې یې دطالبانو سره دسولې په اړه هیڅ طرحه او حتی پروګرام نه لري؛ پوښتنه داده چې دسولې شوری دڅه لپاره جوړه شوې، او ولې د بېچاره ولس له خزانې دومره درانه مصارف او دشوری غړو ته لوړ معاشات ورکول کېږي؟
په کار خو داده چې دسولې د شوری ټول تمرکز پر دې وي چې سوله ولې نه راځي، او کوم ـ کوم خنډونه دسولې مخ ته پراته دي؟ خو په ډېر تاسف سره باید ووایم چې دسولې له نوم څخه ناوړه استفاده روانه ده او محض دعامه ولسې اذهانو دتحریف لپاره وخت ناوخت ترې دسولې کلیشه یې شعارونه رسنیز کېږي.
دسولې پر نوم تمسخر ځکه روان دی چې په سوله ئیز افغانستان کې دکابل تر نیمایي زیات چارواکي خپل ژوند او کاروبار ته خطر محسوسوي، او پوهېږي چې دملت له غبرګون او محکمې سره مخ کېدل یې حتمي دي.
ددوی ګټې او بقاء په جګړه ئیز افغانستان کې نغښتې، دوی پس پرده ده جګړې په تداوم ځکه ټینګار کوي چې دجګړې په لوګیو او لمبو کې ددوی کرغېړنې څېرې له ولس پټې او ورکي دي.
که سترګې پټې نه کړو او صاف حقیقت ووایو؛ دوستم د جمهوري ریاست دمرستیالۍ وړ دی؟
عطاء او شېرزی په دې ارزي چې دیوه داسې ولس نماینده ګي وکړي چې دڅلورو لسیزو جګړو وهلی او ځپلی؟
عبدالله او محقق دومره وړتیا او استعداد لري چې ددوو زبر ځواکونو، ناروا څپېړو وهلي افغانان دیوه روښانه او سوکاله هیواد څښتنان کړي؟
او یا هم بېوسه، کمزوری، ناتوانه او مریض اشرف غني دومره حوصله او استقامت لري چې خپلسري ټوپکمار، قاتلین او دمافیا دبانډ غړي وزیران او قومندانان له پښو وغورځوي؟
دسولې مخ کې همدغه پلن ګېډي ستر خنډونه دي، دوی نه غواړي چې سوله او ارامي راشي، دوی نه غواړي دجګړې بلې لمبې مړې شي او ددوی کرغېړنې څېرې ولس وویني
دوی نه غواړي چې اشغالګر ځواکونه ووځي، افغانان خپله داسې اداره او نظام ولري چې کار اهل کار ته وسپارل شي، مسلکې کادرونه بلا واسطه او رشوت، پر وړ مناصبو وګومارل شي او ددوی واسطه یې اقارب او اوباشان له دندو وشړل شي.
همدا لامل دی چې په هیواد کې دجګړې اور دژبغړاند ساتلو لپاره د داعش ډله په سیمه کې مطرح کړی شوه او په لوړه کچه تبلیغات ورته وشول او لا ورته کېږي.
دملا رسول سنګوریان په هلمند کې رسنیز کړی شول او دتمویل او حمایې لپاره جبار قهرمان سیمې ته ولېږل شو، ننګرهار کې داعش ته کمپاین کېږي، مسلمیار یې تر شاه کلک ولاړ دی اکمال او تمویل یې کوي او په شمال کې چې دداعش شتون محال شو، دعطا او دوستم اوباشان چې له وړاندې وسلې ورکول شوې وې، دداعش پر نوم رسنیو ته معرفي شول.
لنډه دا چې ترڅو اشغالګر موجود وي، او موجوده چارواکي حاکم وي دجګړې لمبې به همداسې بلې وي او دیو څو کرغېړنو څېرو دګټو او اشغالګرو دبقاء لپاره به د افغان ولس وینې په ډېره بې رحمۍ او بې دردۍ سره بهول کېږي.
دصلیبیانو دغوڅ شکست او ښېرازه افغانستان پر هیله
