ليکوال : امین وردګ
آورېدلي به مو وي چې : د (وطن ګوند) یو ځل بیاپه کابل کې رسمي کار پيل کړ ؛ هغه کثیفه او د بې ګناه افغانانو په وینو سره څېره یې بیا را څرګنده شوه ؟
آیا پوهېږئ ! چې (وطن ګوند) د چا ګوند ؤ ؛ د چا دی او د چا به شي ؟
وطن ګوند د هاغه کمونستي ګوند یوه څانګه ده چې : د څورلسمې هجري لمريزې پېړۍ په څلورمه لسيزه کې را و ټوکېدلو او بیا يې له څه باندې دوو لسيزو (سیاسي فعایتونو) څخه په مظلومو او ويدو افغانانو باندې داسې بې رحمانه بريد وکړ چې : تر نن پورې لا بشریت ترې شرميږي.
بلې ! دا همغه کمونستي توکړه ده چې : په افغانستان کې یې د وينو ویالې بهولې وې او لا یې هم بهوي!
دوی ټول په لومړي سر کې یوه ګوندته منسوب وو ؛ چې وروسته بیا په دوو څانګو (خلق او پرچم) سره و وېشل شول ؛ خو کله چې : هغه دواړې ډلې و شرمېدلې ، د افغان مسلمانو وګړو په وړاندې ټينګې نه شوې او تاریخي ماتې یې وخوړه ؛ نو هغه مهال د کرملن واکمونو تکل وکړ چې : باید د تېښتې لپاره خو د خټې کومه پزه جوړه کړي ! نو همغه وو چې : د وتلو په وخت کې یې خپلې افغان اجیرې ډلې ته یو بل او نوی نوم خوښ کړ ؛ تر څو يې تر یوه وخته افغانان په آرامه پرېږدي او په راتلونکي کې (مناسبې موقع ته په کتو سره) یو ځل بیا سر راپورته کړي او د روس په ماته او ګردجنه څېره یوه نرمه ټوټه راتېره کړي ، نو همغه وو چې : ډاکټر نجیب د ((وطن ګوند یا حزب وطن)) په نوم حزب اعلان کړ چې ؛ ظاهراً به دغه حزب د سولې نارې پورته کولې ، مګر اصل کې همغه زوړ ښامار ؤ.
هو ! دا د افغانستان تاريخ ثابته کړې چې : دښمن یې کله په جګړه کې مات شي ، بیا د مکارۍ لپاره د سولې نارې پورته کوي ؛ تر څو هم خپل موقف وساتلای شي او هم د ګور له غاړې بېرته کورته را وګرځي.
راځو اصل مطلب ته !
(وطن ګوند) د ډاکټر نجیب یو کمونست ګوند دی ، دغه ګوند له هماغه لویه سره څخه سیاسي فعالیت کوي ، مګر کله پټ او کله هم لږ را ښکاره غوندې شي ؛ تر دې چې : څو کاله وړاندې یې له امريکایانو سره لاس یو کړ او په افغانستان کې اوسنۍ غربپالې ادارې ته ور ننوت ، ورو ورو یې د خپل پخواني موقف ترلاسه کولو لپاره کوښښونه پیل کړل او یو ځل بیا يې (د پخوا په توګه) پټ پټ سیاسي او اقتصادي فعالیتونه روان کړي .
دا اوس چې افغانستان ته کوم خارجي ښکېلاکګر راغلي ؛ په دغو کې فوځي کمونستان هم شته ! نو ځکه خو یې ورو ورو پخواني کمونستان یو ځل بیا سپوټ کړل او په اداره کې یې تر کليدي چوکیو پورې و رسوول ، کله چې : دوی یو څه قوي او سره راټول غوندې شول ؛ نو یې لومړی انټرنېټي تبلیغات ګړندي کړل ، په لومړي سر کې یې ډاکټر نجیب ته (په ډېره بې شرمۍ سره) د شهید لقب ورکړ او بیا یې د هغه انځورونه د تبليغاتو په توګه ؛ په موټرونو او دېوالونو وځړول ، له بلې خوا به يې د ډاکټر نجیب هغه ویډيوګانې هم ورځ په ورځ د نېټ له لارې خپرولې چې : د مجاهدینو مشران يې د پاکستان او امریکا غلامان پکې بللي وو ؛ دا چې ډېری مشران (متأسفان) په ريښتیا هم غربپلوي او اجیر وختل ؛ نو ځکه یې موږ(افغانان)کمونستانو ته سرټيټي کړو ؛ دا چې د ډاکټر نجیب خبرې تر یوه حده ريښتیا شوې ؛ نو کمونستانو هم دغه خبرې د یوې قوي شمیایي وسلې په توګه وکاروولې او له امله یې ډېری نوي ځوانان دغه تورمخي ګوند (حزب وطن) ته ورمائل کړل .
خو هو ! په څنګ کې یې هغه خپله اصلي څېره هم پټه نکړای شوه ؛ چې د اسلام په توهین او تحقیر پسې یې (تر پخوا لا) ګړندي پلونه اوچت کړل.
دوی په ټولنيزو شبکو کې ؛ ټولنيز ګروپونه او فیسبوکپاڼې هم جوړې کړې چې : یوه له هغو پاڼو څخه د (فکر وکړئ) په نوم پاڼه ده او په همدغه نوم سره فیسبوکي ګروپ هم لري ، ټوله ورځ د اسلام ، قرآن او د الله د نازولي نبي (ص) توهین پکې کوي ، دوی دومره په لوړ مهارت سره تبلیغات کوي چې : کولای شي ځينې ناپوه او نالوستي ځوانان په ډول ډول فکرونو کې ډوب کړي او د هدایت کومی يې تږی پرېږدي ، دوی په دغو تبليغاتو کې چې کله له چا سره بحث کوي ؛ نو احساساتي کيږي نه ! بلکې په سړه سينه سړي ته ځواب ورکوي ؛ خو متأسفانه چې : زموږ ځينې احساساتي ځوانان په ښکنځلو ورته سر شي او چې څه په خوله ورځي هغه ورته وايي ؛ مګر د دوی عکس العمل بیا هم نرم اوهيښوونکی وي.
دا چا په دغه وخت کې کوم بل څوک د دغو دواړو لوریو تر منځ برخورد ته وګوري چې : مسلمان په ښکنځلو زړه یخوي او کمونست یې په خندا ورسره تېروي ؛ نو هغوی دا فکر کوي چې : په ريښتیا هم لکه چې مسلمانان دليل نه لري او یوازې ښکنځلې کولای شي ؛ چې دغه موقف زموږ ټولو حیثیت له منځه وړي .
دا چې دوی دغه پروسه ښه په آرامۍ سره مخته یووړه او لا یې هم وړي او ځانونه یې ښه قوي او پرنفوذه هم کړل ؛ نو اوس یې ښه په ډاډه زړه او په ښکاره توګه د( همغه پخواني کمونستي) حزب نوم یو ځل بیا اعلان کړ او له دې وروسته به ښکاره د اسلام توهین کوي ؛ خو دومره نر به نه وي چې : ((مه !)) ورته ووايي التله په مزدوره اداره کې ! .
نو ګرانو افغانانو ! آيا هغه وختونه ستاسو هېر شول چې : دوی به د کلیو په ځوانانو او هلکانو باندې له پاسه چین لرونکي ټانګونه خېژول ؟
آیا ایماني جذبې مو مړې شوې او که له جګړو ستړي شوي یاست ؟
آیا هغه د شهیدانو له وینو ډک زندانونه مو هېر شول ؟
آیا غواړئ چې هغه شپاړس لکه (۱۶۰۰۰۰۰) شهیدان تر شا او یتیمان یې نهيلي کړئ ؟
آيا غیرت او وجدان مو ویده شوي ؟
څه درباندې وشول چې : د کمونستانو رسمي دفتر مو په کابل ښار کې تحمل کړ او د طالبانو په قطر کې نشئ تحمل کولای ؟
آیا طالبان تر کمونستانو هم بدتر بولئ ؟
له ځينو پخوانيو مجاهدینو څخه خو (چې اوس یې ډېری مشران په یوه چوکۍ ورسره ناست دي) نوره ګيله نه کوو ؛ ځکه چې : له هغوی نه خو هسې هم نوره د جهاد تمه کول ناپوهي بولم ، مګر تاسو (عام خلک) خو لا تر اوسه چا په پیسو نه یاست اخیستي !
نڅوړ ته راځو !
دا چې د کابل واکمنان په یوه څوکۍ کې دوه ناست دي ، حکمتیار صېب هم په کابل کې سنګري دی ، شمالي ټلوالې یو ځل بیا لاسونه سره یو کړل او د دولت په وړانې ګواښل کوي ، روسانو هم د داعش د ځپلو په پلمه افغانانو ته ګواښ وکړ ، راتلو نکي انتخابات هم را نژدې شوي او د دې ټولو سره سره :طالبان د افغانستان په ډېرو او فراخو سيمو باندې نظامي واک او رسوخ تر لاسه کړی ؛ غربیان هم په منډه کې وبولئ او ان شاءالله ټول به وزي ځکه چې : تل په تبۍ ناستی ستونزمن وي ، هغوی نازولي لوی شوي ، په غرونو کې تل او په ناآرامۍ سره ژوند ورته ګران دی ؛ نو څه فکر کوئ چې : په دغه حساسو حالاتو کې به بیا هم خوب کول روا وي ؟
آیا ويښ نه شو ؟
آیا لا هم ناپوهۍ ته دوام ورکړو ؟
آیا پرېږدو چې : يو ځل بیا ګران افغانستان د کمونستانو او ټوپکي ځنارو په پليتو لاسونو کې ولويږي ، د کابل شتمنۍ دې لومړی ولوټول شي او له هغه وروسته بیا موږ اقدام وکړو ؟
آیا بیا هم غواړئ چې : ملي موزیم ، افغان پښتني بانګ او د شهزاده سرای صرافیانې مو یو ځل بیا د شمال د لنډغرو له خوا چور شي آیا غواړئ چې د وزارتونو ټول ليکلي اسنادونه وسووزول شي؟
نه ، نه ! والله که خو داسې مناسبه وي ، وخت له لاسه مه ورکوئ ، د پېښې له وقوع نه وړاندې باید د (کېدونکې) پېښې مخه و نيوول شي ، وروسته بیا هېڅ ګټه نه لري .
که زما منئ !
په فیسبوک یا نورو ټولنيزو شبکو کې چې کله تاسو کوم مزخرف او ناروا شیان و وينئ ؛ نو مه یې خوښوئ او مه مو رایه پرې لیکئ (یانې مه لایک ور کوئ او مه کمېنټ پرې لیکئ) ځکه چې : د دوی هدف هم دا دی چې : تبليغي زهر یې و پاشل شي ! هغه که ته څومره ښکنځلې هم ورته کوې ، د هغوی پکې ګټه د ه ؛ ځکه چې : بیا بیا به یې ليکنه خپريږي او نفوذ به کوي : همدا راز… په فاحشو انځورنو څه مه ليکئ ؛ و لو که د نصیحت په بڼه هم وي ! ځکه چې : کوم څوک دغه کارونه کوي ؛ هغه ستا په دومره واړه نصيحت مشکل دی چې : سم به شي ، یا دا چې : له ګټې یې زیان ډېر دی نو ترې تېر شه ؛ بلکې نور به له لارې پرې وباسې ! ځکه چې : نورو ته ورځي ، بیا نورو ، ورپسې نورو ، نورو ته !.
مقصد ! کله چې : روس په افغانستان بريد وکړ ؛ امریکې له ډاره اوف لا نه شوای کولای ، مګر چې کله یې ماتې وخوړه ؛ نو غربیانو زر برېتونه کش کړل او میدان ته یې را و دانګل ؛ تر څو نړۍ ته خپل (هغه د وتنام) لوېدلی موقف اوس پیاوړی او لاسبری وښيي او ووايي چې : روسان موږ مات کړل ؛ ځکه : هغه تاسو به چې مجاهدین ورته ویل ! هغوی ته مو نن په غاړو کې د بردګۍ زنارونه ور اچولي او له ځانونه سره یې چې هرې خوا ته وغواړو کشکوی يې شو ، حتی ځينې شیخان مو یې هم وپېرل ، چې اوس ټوله شپه د قرآن کريم د مبارکو آیاتونو په تحریف کې فکر کوي ؛ تر څو زموږ اشغال ته د جواز اودوام لپاره حکم ولټووي .
نو زما په اند : که سبا امریکه وتښتېده ؛ بیا به د روس ، چین او هند وار وي ، ځکه چې : دا دریواړه کمونستي نظامونه دي او دوی کلک هوډ لري چې ؛ په افغانستان کې یو قوي کمونستي نظام ټينګ کړي .
نو کوښښ وکړئ چې : کمونستان نفوذ درنه و نه کړي ، اګر که اوس د کابل د واکمنو زور نه پرې رسيږي ؛ خو تاسو ټول په ګډه دا یوه فريضه او وجیبه و وبولئ او په وړاندې يې را ويښ شئ.
که یې نه منئ ! نو راشئ او د همدغې ليکنې په نظرپاڼه کې به و ګورئ چې : کمونستانو څومره نفوذ کړی او زما په هکله څه بابولالې بولي : څوک به پاکستانی راته وايي ، څوک به مې طالب بولي ، څوک به وایي چې : د وطن دښمن یې ، څوک به څه وایي او څوک څه ، خو تاسو حال ته ګورئ .
