کابل غږ
ع خاموش
د نابینایانو لپاره په نړیواله کچه د دې لپاره یو څه کارونه کېږي چې د ملګرو ملتونو تش د بشر د حقوقو په نامه سازمان باندې څوک نیوکې ونه کړي، چې نابینایانو ته هیڅ توجه نه کېږي. دا چې ځینې وختونه د بشر د حقوقو سازمان د نابیانایانو لپاره د بشر د حقوقو په نامه یو غږ پورته کوي او د امریکا په مشرۍ د هغه هېوادونو په انسان وژونکو کړنو سترګې پټوي چې د انسان وژونکو وسلو جوړول یې د خپل اقتصاد پیاوړتیا ګڼلې ده.
تېره اونۍ په کابل کې د نابینایانو لپاره په بریل خط لیکل شویو کتابونو کتابتون جوړکړل شو. خو دا څلوېښتم کال دی چې شرق او غرب په افغانستان کې د انسان وژني لپاره د بارودو او وسلو انبارونه جوړکړي دي. هره ورځ پرې افغانان وژل کېږي او کم شمېر یې معیوب شي چې په افغانستان کې د روسیې او امریکا تر منځ د سیالیو په دوران کې تر دوه میلیونو زیات افغانان معیوب کړل شول.
له یوې خوا غربي هېوادونو چې په سر کې یې امریکا ده، په افغانستان کې یې پر افغانانو خپلې ډول ډول وسلې وازمایلې او له بلې خوا بیا په یوه او بل نامه بنسټ جوړ او د افغانانو لپاره د خیریه موسسې په نامه کارونه پیل کړي.
د ارمان په نامه بنسټ هم له بهره جوړکړل شوی دی. وایي چې تر څه حده به د دې بریل کتابتونو په وسیله یو څه ستونزې حل کړل شي؛ خو دا خیریه بنسټ باید د دوه میلیونو زیاتو معیوبو افغانانو لپاره امساوې هم جوړې کړي، چې د روسانو او امریکايي الوتکو په ړندو بمباریو کې معیوب کړل شوي دي.
د همدې امریکا او دمخه د روسانو د هوايي الوتکو د بمبار له امله افغانان په ذهني ناروغیو اخته شوي دي. د هغوی لپاره دې دا له بهره جوړ شوي په یوه او بل نامه بنسټونه د رواني ناروغیو درملنې لپاره روغتونونه هم جوړ کړي.
موږ دا منو چې لومړی روسانو او اوس امریکایانو افغانان په ډیرې بې رحمۍ سره شهیدان او معیوب کړل؛ خو په دواړو وختونو کې یو شمېر تش په نامه جهادي مشرانو (د قدرت لېونیانو) او په روبلو- ډالرو پت پلورو افغاني غلامانو هم د افغانانو په معیوبولو کې ونډه اخیستې ده، چې په هیڅ صورت د بخښنې وړ نه دي. که نابینایانو ته د بشر د حقوقو یا بل کوم سازمان د بریل کتابونو کتابتون جوړوي؛ نو معیوبینو ته دې امساګانې هم جوړې کړي.
