تبصره
د افغانستان لپاره د امریکا د نوي جمهور رئیس د ستراتیژي اعلان دومره وځنډول شو چې اوس د امریکا په سنا مجلس کې وکیلانو له ټرمپ سره مخالفت وښود. ویلي یې دي، څومره چې د افغانستان لپاره د امریکا نوې ستراتیژي ځنډېږي هومره په تاوان تمامېږي؛ ځکه چې په افغانستان کې د افغان پولیسو په پرتله اوس پر بهرنیو (امریکایي) پوځونو مرګوني بریدونه زیات شوي او د نوې ستراتیژۍ په نه اعلان سره په افغانستان کې د مېشتو امریکایي او ناټو پوځونو قوماندان جنرال نیکولسن هیڅ ډول اقدام نه شي کولای.
څو ورځې وړاندې په افغانستان کې پر امریکایي او ناټو پوځونو د بریدونو په زیاتوالي ټرمپ، نيکولسن له دندې په ګوښه کولو وګواښه. اما د سنا مجلس په افغانستان کې د امریکایي او ناټو پوځونو د قوماندان نیکولسن کړنې کامیابي وبللې. خو دا چې د افغانستان لپاره د امریکا نوې ستراتیژي نه ده څرګنده؛ نیکولسن ګرم نه دی، بلکې په افغانستان کې د جګړې په ناکامیو او د امریکا په میلیاردونو ډالرو تاوان پړه پر ټولو وزیرانو او په حکومت کې په لوړو پوستونو چارواکو ده، چې د جګړې رهبري یې په سالمه توګه نه ده کړې، ځکه مو د ۱۶ کالو په تېرېدو سره لا جګړه نه ده ګټلې.
د امریکا یو شمېر سناتوران په افغانستان کې پر بهرنیو پوځونو د مرګونو بریدونو پړه د اوباما پر حکومت وراچوي، چې د دا ډول ستونزو (پر بهرنیانو د بریدونو) په مقابل کې یې پالیسي نه ده روښانه کړې، چې د وسله والو طالبانو په مقابل کې د هوایي بمبار علاوه بله کومه لاره غوره کړي.
د څه مودې راپدېخوا په رښتیا هم د افغان امنیتي پوځونو په پرتله پر بهرنیو ځواکونو د طالب وسله والو مرګوني بریدونه زیات شوي دي چې د ټرمپ اداره یې وار خطاکړې ده او اوس وکیلان له ټرمپه غواړي چې ژر تر ژره د افغنستان لپاره نوې ستراتیژي روښانه کړي.
دا مهال په ولایاتو او خپله د کابل په مرکز کې طالب وسله والو پر بهرنیوځواکونو مرګوني بریدونه زیات کړي دي چې هره ورځ له کابله امریکا ته د امریکایي پوځونو جسدونه لېږل کېږي.
څو ورځې ټرمپ په دې فکرکې و چې په افغانستان کې د تېرو ۱۶ کالو په مرګونو او تاوانونو چې امریکا ته وا وړېدل، باید له افغانستانه ټول پوځونه راوباسي؛ له يوې خوا به د يو شمېر امريکايي سياستوالو غوښتنې ومنل شي او له بلې خوا به امريکا له اقتصادي بحران څخه وژغورل شي.
خو د امريکا په سنا مجلس کې د جان مککين په شمول يو شمېر سناتورانو له ټرمپه وغوښتل: که له افغانستانه پوځونه راوباسي په نړيواله کچه بايد په افغانستان کې نظامي او سياسي ماتې ومني چې د دې ماتې په منلو سره به بيا امريکا په نړيواله کچه انزوا هم قبلوي او دا انزوا د امريکا د مرګ په مانا تمامېږي.
اوس ټرمپ په دې کې حيران پاتې دى چې په افغانستان کې خپل پوځونه زيات کړي او که یې نورهم راکم کړي. که ټرمپ په افغانستان کې خپل پوځونه زيات کړي نو دا به یې يوه لويه اشتباه وي، چې اوباما دا اشتباه کړې وه او په بشپړه توګه یې له افغانستانه خپل پوځونه ونه ایستل. که یې ایستلي وای نو لکه د روسانو ماتې به یې منلې وای. اوس امريکا په افغانستان کې نښتې ده؛ نه پوځونه ایستلاى شي او نه نور په ميلياردونه ډالرو لګښتونو ته غاړه ږدي. همدا یې ستر لامل دی چې ټرمپ په افغانستان کې د ستراتيژۍ په اړه ټینګار کوي. په افغانستان کې یې پر پوځونو مرګوني بريدونه زياتېږي؛ که یې اعلان هم کړي دا به یې د اوباما په څېر يوه ستره تېروتنه وي.
