عبدالهادي
په یوه تازه خپاره شوي راپور کې ویل شوي، د ټولنیزو شبکو (Social Media) د کاروونکو شمېر تر ۳ میلیارده کسانو اوښتی او هره ورځ یې د کاروونکو په شمېره کې زیاتوالی راځي.
د راپور له مخې، د ټولنیزو شبکو د کاروونکو شمېر د کموالي پر ځای هره ورځ پورته کېږي. ویل کېږي هره ورځ نږدې یو میلیون کسان ټولنیزو شبکو ته مخه کوي.
اوس مهال تر ۳ میلیارده زیات کسان په ټولنیزو شبکو کې اکاونټونه لري. مانا دا چې د نړۍ نیمايي نفوس په هره ورځ کې یو وار ټولنیزو شبکو ته سر ورښکاره کوي.
د Hootsuite او We Are Social په نوم ویبپاڼو له لورې په یوه تازه خپور شوي رپوټ کې ویل شوي چې ټولنیزې رسنۍ ۳،۰۲۸ میلیارده فعال کاروونکي لري. دا یوه هېشوونکې شمېره ده، ځکه چې ویل کېږي د ټولې نړۍ نفوس شاوخوا ۷،۵۲۴ میلیارده کسانو ته رسېږي.
د سوشل مېډیا په نړۍ کې فېسبوک تر ټولو مخکې دی. ځکه فېسبوک هره میاشت ۲،۰۴۷ میلیارده فعال کاروونکي لري، د فېسبوک نور ملکیتونه، واټس اپ او میسنجر هم د یو میلیارد فعالو کاروونکو په درلودلو سره په دویم او درېیم نمبر راځي.
د نړۍ د نفوس ۴۰ سلنه خلک ټولنیزې رسنۍ کاروي خو ۳،۸۱۹ میلیارده کسان انټرنيت ته د لاسرسي سره سره، په ټولنیزو رسنیو کې اکاونټونه نه لري. د ټولنیزو رسنیو زیاته برخه د موبایل کاروونکي جوړوي؛ ځکه ۲،۷۸۰ میلیارده کسان ټولنیزو رسنۍ په موبایل کې ګوري.
