حکمتیار صاحب ته هرڅه نه چلید!

کابل ټکی کام ۲۸زمري ۱۳۹۴ لیکنه: محمد حسین څوکیوال د افغانستان په تېر دولتي نظام کې چې کرزي یې مشري کوله، څو څو ځله ښاغلي حکمتیار صاحب یې له کرزي وغوښتل چې په دولت کې یې شامل کړي، کرزي د سلا مشورو وروسته حکمتیار صاحب ته منفي ځواب ورکړ، حکمتیار صاحب د خواشینۍ سر په ځنګون کېښود، هېڅ یې نه شوای کولای، ځکه هغه ته پخوانۍ زور او شور نه ؤ ورپاتې. بیا یې په افغانستان کې د خال خال جګړې خبر ورکاوو، چې زمونږ جنګیالي د دولت ځواکونو سره به جګړه کې بوخت دي، تر ډېره یې کرل رېبل، چې نور څه وکړي کرزي هم پېژندلی ؤ، چې تر آخره یې په دولت کې خاص حکمتیار صاحب ته د پښې اېښودنې ځای ور نه کړ. تېرو ولسمشرۍ انتخاباتو کې یې هغه خپله وعده چې ولس سره یې کړې وه په غلام دولت کې به برخه نه اخلم، هېره کړه بیا یې د ولس نه په ډېره سپین سترګۍ وغوښتل چې د خپل ګوند استازۍ هلال ته رایه ورکړئ. که قطب الدین هلال د حکمتیار صاحب له ګونده نوماند نه وای شاید زیاتی رایې یې په خپل اهلیت وړې وای، خو دومره رایې یې واخیستې چې له شرمه یې پرې وینا هم نه شوای کولای، هغه د دري ژبې متل دی چې (نه چلېد).  د حکمتیار صاحب زور ازماینه هغه وخت شروع شوه چې د جهادي ګوندونو مشرانو سره یې ښکرې اړمې کړې، ویل یې چې یوازې زما ګوند دې د جهاد په ډګر کې پاتې شي، او د ارګ اقتدار دې تر لاسه کړم، خو سره له دې چې پراخه بهرنۍ ملتیا ورسره وه، په خپل منځي تنظیمي جګړو کې ( نه چلېد). هغه دوستم چې په خلاف یې ددوی د ګوند شعار دا و: «جنګ، جنګ، جنګ تا ختم ګلمجم» او د اقتدار لپاره یې ورسره لاس یو کړ، چې ارګ ته د دوستم په اوګو سور ورسیږي خو بیا هم( نه چلېد). ډاکټر نجیب الله چې ملي پخلاینه اعلان کړه، د پېښور د نشاط میل په غونډه کې ښاغلي حکمتیار صاحب وویل د کمونستانو سره ګډ حکومت په دې معنا دی چې کمونستي نظریې ته مو غاړه کېښوده، او غلام حکومت مو ومانه، د غونډې په ټولو ګډونوالو یې د قسم لاسونه د خپلو لاسونو په اشاره پورته کړل، خو د اقتدار په هیله یې د شهنواز تڼی سره د اقتدار د شرکت فیصله وکړه، بیا هم (نه چلید) څه موده مخکې یې  اشرف غني تر تأثیر لاندې راوستلو او د داعش په مشرتابه د راتللو او اقتدار ته د رسیدلو خوب یې ولیده، په ډېر افسوس د دوستم په څېر د یوې وحشي ډلې حمایت یې اعلان کړ، او له بغدادي سره یې بیعت هم وکړ، خو داعش ډلې ته چې د حکمتیار صاحب ماضي څرګنده وه، داعش هم ورته د یو عادي افغان په څېر اهمیت ور نه کړ، هغه خوب چې که ګوندي (داعش یار به وزن حکمتیار) شم او اقتدار ته به ورسېږم، د حکمتیار په نامه خو هیڅ هم و نه شول، بیا (نه چلید). حکمتیار صاحب فکر کاوه د داعش ډلې تجربه نشته، مشري به ماته لاس ته راشي، او له طالبانو به هغه غچ وا خلم چې په چار اسیاب کې را نه د تېښتې پر مهال پکول پاتې شو، پر طالبانو به خپل له اوره ډک زړه له داعش سره په ملګرتیا سوړ کړم، طالب به له منځه ولاړ شي، زه به بیا په هغه زور او شور کې یم…، ولا بیا (نه چلید). حکمتیار صاحب! د یوه مجاهد، افغان او پښتون په سترګه درته ګورم. والله چې بد مې درباندې ندي پېرزو! دا هم منم چې ما په لیکنه کې درته تېزې خبرې وکړې، خو د بل بده وینا مې در باندې نه لوریږي، بیا هم ستا دفاع کوم. که نور نه وي د یوه پښتون په حیث مې هم در باندې د چا بده وینا نه لورېږي. حکمتیار صاحب! نور توخدای دا د چوکۍ مینه پرېږده. دې منصب کې تا څه لېدلي دي چې نه یوازې ځان دې پرې سپک کړ بلکې ټول تنظیم دې ورسره بدنام کړ، زما دې په خدای سره قسم وي چې له تا مې ډېره دفاع کړې، خو  اوس دې په نامه شرمېږم. زړه نا زړه یم چې د چا شعر به وي خو شاید د حمید بابا وي وايي چې: ما سهار سبا لیدلی ؤ د چا مخ *** چې مې درسته ورځ و نه لیدو دا ستا مخ زړه مې در باندې درد وکړي، څومره هلو ځلو ائتلافونو، اختلافونو، سازشونو، معامله ګرمۍ، د بهرنیو سره د معاملو، ولس ته د سوالونو بیا هم تا د چا مخ لیدلی، چې د ارګ مخ دې و نه لیدو، دا به د شهیدانو د وینو سره د جفا ازار وي او که د چار اسیاب څخه پر کابل ویشتونکو میزایلو له امله د کابل د کونډو او یتیمانو ازار وي، چې ته یې همداسې ناامیده پرېښودې. توخدای له خپل قسم خوړلي دښمن مسعود سره دې د طالبانو خلاف ائتلاف وکړ ترڅو له طالبانو غچ واخلې، خو چې ستا نصیب نه چلید دی هغه بېله خبره ده.  د اشرف غني نه مخکې دې د کرزي دولت ته د یوه غلام دولت نسبت کولو، چې د امریکا د لاس کېنولی او د بڼ د غونډې غیر اسلامي او غیر شرعي دولت دی، اشرف غني خو هم د جان کیري لخوا د جوړ دولت رئیس جمهور دی. کرزي لا دومره افغانانو ته رسوا نه ؤ، له امریکا افغانستان ته را ولېږل شو، اشرف غني خو جان کیري له امریکا لاس نیولی تر ارګه راورسوو، او د ټولو افغانانو په وړاندې یې په تخت کېناوو.   ستا جهادي عظمت او اوس اشرف غني ته په پښو کې سر اېښودل، هغه دا چې یو ځل بیا دې کابل ته خپل نماینده ولېږه، تر څو په اقتدار کې ورسره شریک شې، وژړولم، سر له وخته زیری درواخله چې دا به هم (نه چلید) شي. یادونه: په کابل ټکی کام کې ضروري نده چې د هر لیکوال نظر دې د ادارې له اصولو سره اړخ ولګوي. ستاسو ټولو افغانانو نظرونه او لیکنې چې د نشر وړ وي کابل ټکی کام یې خپروي. – See more at: https://kabull.com/Maqalay_Details.php?maqala_details=31#sthash.9RKiBd88.dpuf