لیکوال : محمد نذیر (ذییح)
راځئ چې فکر وکړو ….
په دنیا کې څوک زمونږ ډېر خوښیږي؟
د کومو خلکو سره مینه لرو؟
اکثر چې مونږ فکر کوو نوله کومو خلکو متاثر کېږو؟
د کومو خلکو عملونه او کړه وړه مو خوښیږی؟
راځئ چې دا پوښتنې له خپلو ځانونو وکوو او خپل سر ګرېوان ته ښکته کړو او په خپل ذهن کې ورته ځواب پیدا کړو …
او بیا د رسول الله صلی الله علیه وسلم فیصله کوونکی حدیث را یاد کړو چې هغه صلی الله علیه وسلم وسلم فرمایي : يحشر المرء مع من يحب (یو سړی به د قیامت په ورځ د هغه کسانو سره را پورته کیږي چې دده خوښ وي)
هی … ماته خو اوس را یاده شوه د ځینې خلکو چې رقاصان او ډانسران خوښ وي … د ځینې خلکو چې سندر غاړي او هنر مندان خوښ وي … د ځینې خلکو چې کفار خوښ وي او د هغوی له کړو وړو متاثر شوي وي، د ځینې خلکو به همجنس بازان خوښ وي ، د ځینې خلکو به چرسیان او عملیان خوښ وي … د ځینې خلکو به نېکان او صالحین خوښ وي ، د ځینو خلکو به مجاهدین او د اسلام لپاره مبارزه کوونکی خوښ وي ، د ځینې خلکو به اسلامي دعوت ګران خوښ وي … نو هرڅوک باید له اوس نه د خپل محشر په اړه فکروکوي چې په قیامت کې به له هغوی سره را پاڅیږي صحابه کرامو رضی الله عنهم ته چې کله دا حدیث ورسېدو ټول پدې خوشحال شول او ویل یې زمونږ رسول الله صلی الله علیه وسلم خوښ دي ، زمونږ حضرت ابو بکر صدیق رضی الله عنه خوښ دی زمونږ حضرت عمر رضی الله عنه خوښ دی نو مونږ به د قیامت په ورځ له دوی سره را پورته کېږو .
علماء کرام د حدیث په تشریح کې فرمايي : وجه یې داده چې څوک له چا سره مینه کوي ، چې څوک یې خوښیږي نو د هغوی مینه پرده باندې هر وخت غالبه وي ، هر وخت یې په زړه کې د هغوی یاد وي ، اکثر د هغوی په ډول د عملونو د زده کولو او کولو کوښښ کوي او د هغوی له عملونو متاثر کیږي ددې وجې نه الله تعالی فرمايي : مسلمانان له کفارو سره مینه نه کوي اګر که هغه کفار د دوی پلرونه ، زامن او وروڼه او خپلوان هم وي الله تعالی فرمایي :
لَا تَجِدُ قَوْماً يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءهُمْ أَوْ أَبْنَاءهُمْ أَوْ إِخْوَانَهُمْ أَوْ عَشِيرَتَهُمْ . سورة المجادلة
ترجمه : او وبه نه مومي ته (اې محمده او مناسبه هم نه ده چې ته بیا مومي) یو قوم چې ایمان یې راوړی وي په الله تعالی او په ورځې د قیامت چې دوستي به کوي دوی له هغه چا سره چې مخالفت کوي له الله تعالی او له رسول د دغه الله تعالی اګر که وي (دغه مخالفین) پلرونه د دوی او زامن د دوی یا وروڼه د دوی یا خپلوان د دوی .
په پورتني ایت کې الله تعالی د مؤمنانو په اړه اعلان کړی دی چې دوی د کفارو سره دوستي نه کوي اګر که هغه کفار د دوی نېږدې خپلوان هم وي .
د حضرت عبد الله بن مسعود او حضرت ابو موسی الاشعري رضی الله عنهما څخه روایت دی هغوی فرمایي رسول الله صلی الله علیه وسلم ته یو کس راغلو ورته یې وویل : يا رسول الله كيف تقول في رجل أحب قوماً ولما يلحق بهم ؟ (د هغه کس په اړه څه وایې چې یو قوم یې خوښ وي خو تر هغوی پورې پیوست شوی نه وي؟) رسول الله صلی الله علیه وسلم ورته وویل : المرء مع من أحب ( یو سړی به له هغه چا سره وي چې دده خوښ وي) متفق علیه
پدې اړه مختلف واقعات او مختلف روایات راغلي دي چې رسول الله صلی الله علیه وسلم فرمايلي دي چې په قیامت کې به یو ا نسان له هغه چا سره وي چې د چا سره یې مینه وي .
نو راځئ چې فکر وکړو … زمونږ زړونه د چا خواته مائل دي؟ که د داسې چا لوري ته مائل شوي وی چې مونږ نه غواړو په آخرت کې د هغوی سره په صف کې ودریږو نو راځې چې په زور یې د هغوی له مینې را وګرځوو ، د هغوی خیالات له زړونو څخه وباسو دا باطلې مینې ، دا د باطلو خلکو خوښېدل او د هغوی مېنه زمونږ زړونو ته شیطان را اچوي مونږ یې باید ورڅخه وباسو ، او د هغو خلکو مینې ته په زړه کې ځای ورکړو چې زمونږ یقین وي چې هغوی به په آخرت کې کامیاب وي او که مونږ په آخرت کې د هغوی په صف کې را پورته شو نو پښېمانتیا به مو په برخه نه وي .
او کله خو چې مونږ په ضد کې راشو نو بیا خو هرشی وایو خو چې په رښتیا سره خپل سر ګرېوان ته ښکته کړو هرڅوک په ښه او بد فیصله کولی شي هرڅوک دومره فیصله کولی شي چې آیا زما د پاره ښه خبره ده چې د قیامت په ورځ کې د هنرمندانو او سندر غاړو په صف کې را پاڅېږم؟ آیا چې زه د رقاصانو او ډانسرانو په صف کې را پاڅېږم دا ښه خبره ده؟ آیا چې زه د یهودو او نصاراوو په صف کې را پورته شم دا د خوشحالی خبر دی….؟ بس چې په محشر کې د چا سره په یو ځای را پاڅېدل غواړو نو په دنیا کې به د هماغه خلکو سره مینه او محبت وکوو او د هغوی مینې ته به په زړه کې ځای ورکړو … او بیا به د هغوی په نقش قدم روان شو .. راځئ چې پدې اړه لږ فکر وکړو …. له توجه مو یوه نړۍ مننه دوستانو بې تاسې د نه شم
